ئه‌ڤرۆ كوڕێن خابووری ب ژڤانن بۆ سه‌ركه‌فتنا ئێكێ
عەلی حاجی:
چاڤه‌ڕێ دهێته كرن ئه‌ڤرۆ ل ده‌مژمێر 9:30 شه‌ڤ تیما ته‌پا پێی یا یانه‌یا زاخۆ یارییا خوه یا دویێ ژ هه‌ڤڕكیێن خولا ستێرێن ئیراقێ یا پیشه‌كاران و یا ئێكێ دناڤ ئه‌رد و جه‌ماوه‌رێ خوه دا ئه‌نجامبده‌ت ده‌مێ مێڤاندارییا یانه‌یا نه‌جه‌ف دكه‌ت.
ل دۆر به‌رهه‌ڤیێن تیما زاخۆ دلژار عەدنان ئه‌ندامێ كارگێرییا یانه‌یێ بۆ رۆژنامه‌یا ئه‌ڤرۆ گۆت: هەمی بەرهەڤی بۆ یارییا ئه‌ڤرۆ به‌رانبه‌ر نه‌جه‌ف هاتینه كرن و رژدی بۆ قه‌ره‌بوویا خوساره‌تییا یارییا دگه‌ل جه‌وییه بهێته كرن و ئارمانجا سەرەکی سەرکەڤتنە، ژبه‌ركو سێ خالێن یاریێ دێ تیمێ بەر ب رەوشەکا باش ڤە چیت و کەڤیتە ل سەر ڕێیەکا دروست، ئەوا پێدڤی بۆ تیمێ هاتیه به‌رهه‌ڤکرن و چو یاریزانێن هنگاڤتی نینن و پرانیا یاریزانان د بەرهەڤن بۆ یاریێ و دبیت هندەک یاریزان بۆ چەند خولەکان بەرهەڤ بن بۆ یاریێ لێ هەکە پێدڤی پێ هەبیت راهێنەری دێ پشکداریێ ب وان یاریزانان کەت، یاریزانێن تیمێ ژی سوز داینە بشێن باشترین ئاست پێشکێش بکەن پێخەمەتی هندێ کو ئێکەم سەرکەڤتنێ تومار بکەین و نابیت ب چو ڕەنگان خالان د یاریگەها خوە دا ژ دەست بدەین.
ناڤبری گۆت ژی: یاریگەها مە ئامادەیە بۆ یاریێ وهەمی پێدڤیێن ڤارێ ژی هاتینە دابینکرن و هەتا کەنالێن عەرەبی یێن بناڤ و دەنگ ژی دێ یاریا مە ڤەگوهێزن و ئەڤە ژی دێ بیتە خالەکا باش کو جەماوەرێ مە روویێ جوانێ جەماوەری نیشانی وەلاتێن دیتر بکەت.
ل دوماهیێ گۆت ژی: جەماوەرێ یانێ بەرهەڤیەکا باش کرینە و پشت راستم دێ نمونەیەکا جوان یا پشتەڤانیێ کەن و ئامادەکاریێن باش بۆ وێ چەندێ هاتینە کرن،لێ پێدڤیە ئێدی ڕاگەهاندن ب وژدان بیت و ب خرابی بەحس ل جەماوەرێ یانێ کەت.
