ئه‌ڤرۆ لیڤه‌رپۆل و ئه‌تله‌تیكۆ مه‌درید د كۆمپیتكا هه‌ڤڕكیێن چامپیۆنزێ دا
ئه‌ڤرۆ،
جه‌ماوه‌رێ وه‌رزشی تایبه‌ت یێن یاریا ته‌پا پێی چاڤه‌ڕێ یاریێن ئه‌ڤ شه‌ڤه نه ئه‌وێن دێ دناڤبه‌را هنده‌ك مه‌زنه یانێن ئۆرۆپا دا هێنه كرن ژ چارچووڤێ هه‌ڤڕكیێن گه‌ڕا سێیێ ژ قاره‌مانیا یانێن ئۆرۆپا قاره‌مانێن خولا چامپیۆنز لیگ كو بڕیاره هه‌شت یاری ژ چار كۆما بهێنه ئه‌نجامدان.
كۆما ئێكێ.
ل ده‌مژمێر ده‌هێ شه‌ڤ یانا پاریس سانجێرمان یا فره‌نسی یاریگه‌ها خوه پارك دی برێنس مێڤانداریا لایبزیك یا ئه‌لمانی كه‌ت، خودانین ئه‌ردی ئه‌وا ب چار خالان سه‌رێ لیستا كۆمێ دهێت دێ ب چه‌كێ گڕان هێته دناڤ یاریگه‌هێ دا ژوانا كلیان مبابی، ماركو فیراتی، سێرجیۆ رامۆس، نیمار و دیماریا، پشكداریا لیونێل مێسی د گۆمانێ دایه، ژلایێ خوه‌ڤه لایبزیك ئه‌وا بێی خال رێزا دووماهیێ دهێن د مه‌ترسیا ژ ده‌ستدانا پلێتا ده‌ربازبوونێ یه بتنێ سه‌ركه‌فتن دێ هیڤیێن وێ گه‌شكه‌ت لێ هه‌مبه‌ری تیمه‌كا ب خه‌ونێن مه‌زن بۆ چامپیونزێ هه‌نه ئه‌ركێ وێ سانه‌هی نابیت، یاریا دویێ یا ڤێ كۆمێ دێ دناڤبه‌را مانچسته‌ر ستی یا نگلێزی و كلۆپ بروچ یا به‌لجیكی بیت ئه‌وا دێ ل ده‌مژمێر 7:45 شه‌ڤ هێته كرن، خودانێن ئه‌ردی كلۆپ چار خالان رێزا دویێ دهێت دێ كه‌فته لبن تاقیكرنه‌كا بهێز هه‌مبه‌ری یاریزانێن پیب گۆاردیۆلایی ژوانا كیڤن دیبروین، ره‌حیم ئسترلینگ ئه‌وێن پێدڤی ب سێ خال هه‌ین و چاڤ ل سه‌ركه‌فتنێ یه.
كۆما دویێ.
ئێك ژ بهێزترین یاریێن ئه‌ڤ شه‌ڤه و كۆپیتكا هه‌ڤڕكیان دا دێ ل یاریگه‌ها وێندا مێترۆبێلیتانۆ بیت كو یانا ئه‌تله‌تیكۆ مه‌درید یا ئسپانی مێڤانداریا لیڤه‌رپۆل یا ئنگلێزی كه‌ت، هه‌ردو تیم دێ ب ئارمانج و هیڤیێن سه‌رێ لیستێ هێنه دناڤ یاریگه‌هێ دا ژبه‌ركو لیڤه‌رپۆل خودانا شه‌ش خالان سه‌رێ لیستێ یه و ئه‌تله‌تیكۆ ب چار خالان رێزا دویێ دهێت دێ یاریه‌كا پری هه‌ڤڕكی بیت تایبه‌ت بۆ ستێرا یانا ئسپانی لویس سۆارێز ئه‌وێ133 یاری بۆ یانا ئه‌نگلێزی ئه‌نجامدایه و 82 گۆل تۆماركرین لێ ئه‌ڤچاره یێ داخازكریه گۆلا ل سه‌ر ئه‌ڤێ یانێ تۆماربكه‌ت، ئه‌ڤچه‌نده ژی ب سانه‌هی نابیت هه‌مبه‌ری ستێرا لیڤه‌رپۆل محه‌مه‌د سه‌لاح و مانی و فرمینهۆ وتیاگۆ ئالكانتارا، ژلایه‌كێ دووڤه پۆرتۆ یا پورتۆگالی دێ مێڤانداریا ئه‌ی سی میلان یا ئیتالی كه‌ت، یانا پۆرتۆگالی ب خاله‌كێ رێزا سێیێ دهێت و میلان بێی خال رێزا دووماهیێ یه، یاریا ئه‌ڤرۆ بۆ یانا ئیتالی یا بزه‌حمه‌ته تایبه‌ت نه پشكداریا یاریزانێن وێ تیۆ هێرناندێز، ئیبراهیم دیاز،مایك ماینان، جونیرۆ مێسیای، تیمۆ باكایۆكۆ، ئه‌لیساندرۆ فلۆرێنێز و ئه‌لیساندرۆ بلێزاری ژبه‌ر هنگاڤتنێ، لێ ڤه‌گه‌ڕیانا ئانتی رێبیتَچ دێ پالده‌ر بیت بۆ یاریزانێن یه‌ده‌ك هێزێ بده‌ته تیما وان بۆ زانین هه‌ردو یاری ده‌مژمێر ده‌هی شه‌ڤ هێنه‌كرن.
كۆما سێیێ.
ده‌مژمێر ده‌هێ شه‌ڤ یانا برۆسیا دورتمۆند یا ئه‌لمانی دێ بیته مێڤانا ئه‌یاكس ئه‌مستردام یا هۆله‌ندی كه‌ت ئێك ژ یاریێن بهێز یێن ڤێ كۆمێ دا، ئه‌یاكس ب شه‌ش خالان سه‌رێ لیستێ دهێت و مێڤانا وێ ب هه‌مان خالان كێمتریا گۆلان رێزا دویێ دهێت، دێ یاریه‌كا هه‌ڤڕكیێ بیت بۆ سه‌رێ لیستێ، ژلایێ خوه‌ڤه پشكتاش یا توركی دێ مێڤانداریا سپۆرتیگ له‌شبۆنه كه‌ت، هه‌ردو تیم رێزێن سێیێ و چارێ دهێت بێی خال ئانكۆ د هه‌ردو یاریێن بوری دا خوساره‌ت بووینه، ئه‌ڤ یاریه ده‌مژمێر 7:45 شه‌ڤ هێته‌كرن.
كۆما چارێ.
یانا ریال مه‌درید یا ئسپانی دێ لبن گڤاشتنێن جه‌ماوه‌ری و یاریگه‌هێ بیته مێڤانا شاختار دۆنێسك یا ئوكراین د یاریه‌كا ب سانه‌هی نابیت، یانا ئسپانی سێ خال هه‌نه و رێزا دویێ دهێت و چاڤ ل ڤه‌گه‌ڕیانا خوه یا بهێزه پشتی شكه‌ستنا نه چاڤه‌ڕێكری ل گه‌ل شیریف یا مۆلدیڤیایێ ل یاریگه‌ها خوه دایی كو دێ پشتبه‌ستێ لسه‌ر ستێرێن خوه بنزێمه، لۆكا مۆدرێچ، كاسمێرۆ، فینیسیۆس، هازارد و كامافینگا كه‌ت، ژلایێ خوه‌ڤه شاختار دێ بزاڤێ كه‌ت ب گه‌هیته خالا چارێ ئه‌وا نوكه رێزا دووماهیێ دهێت ب خاله‌كێ، ژلایه‌كێ ئه‌نتر میلان یا ئیتالی دێ ل یاریگه‌ها خوه مێڤانداریا یانا شیریف تیراسیۆل ئێك ژ تیمێن دهێته هژمارتن هه‌سپێ چامپیۆنزێ كه‌ت، ئه‌نتر ئه‌وا ب خاله‌كێ رێزا سێیێ یه و یانا مولدیڤیایێ شه‌ش خال ژ دو سه‌ركه‌فتنان سه‌رێ لیستێ دهێت، هه‌ردو یاری دێ ل ده‌مژمێر ده‌هێ شه‌ڤ هێنه ئه‌نجامدان.
