ئه‌ڤرۆ ل دهۆكێ نڤێژا بارانێ دێ هێته كرن
دهۆك، نه‌وزاد هلۆری:
بڕیاره ئه‌ڤرۆ به‌ری نیڤرۆ ل گه‌ره‌كا نزاركێ یا سه‌ر ب سه‌نته‌رێ باژێرێ دهۆكێ ڤه نڤێژا بارانێ بهێته كرن و خه‌لك ژی بۆ ڤێ مه‌ره‌مێ هاتیه داخوازكرن.
عه‌بدولره‌زاق كوڤلی، جێگرێ رێڤه‌به‌رێ گشتیێ ئه‌وقاف و كاروبارێن ئایینی ل پارێزگه‌ها دهۆكێ بۆ رۆژناما ئه‌ڤرۆ گۆت: “ئه‌م یێ به‌ر ب هه‌یڤا 12ڤه دچین و هێشتا باران نه‌هاتینه و مه‌ترسیا هشكه‌سالیێ یا هه‌ی، له‌وا وه‌كو ئه‌وقاف و كاروبارێن ئایینی ب هه‌ڤكاری ل گه‌ل لقێ دهۆكێ یێ ئێكه‌تیا زانایێن ئایینێ ئیسلامێ ل كوردستانێ و ئه‌وقافا دهۆكێ خه‌لكێ خوه ئاگه‌هدار دكه‌ین كو ئه‌ڤرۆ 29/11/2021 نڤێژا بارانێ دێ هێته كرن”.
زێده‌تر گۆت: “داخوازێ ژ خه‌لكێ خوه دكه‌ین كو پشكداریێ د نڤێژێ دا بكه‌ن، داكو خودایێ مه‌زن ژی ب دلوڤانیا خوه بارانان ببارینیت”.
رێوره‌سمێن نڤێژا بارانێ ل ده‌مژمێر 11:00ێ سپێدێ ل هه‌مبه‌ر كۆمپانیا تویوتا یا ترۆمبێلان ل گه‌ره‌كا نزاركێ دێ هێته ئه‌نجامدان.
