ئه‌ڤرۆ مه‌زنه یانێن ئورۆپا هه‌مبه‌ری ئاسته‌نگێن ب هێز دانه
ئه‌ڤرۆ،
دهێته چاڤه‌ڕێكرن ئه‌ڤرۆ هه‌شت یاریێن دی یێن ب هێز ژ قۆناغا كومان یا گه‌ڕا ئێكێ ژ چارچووڤێ قاره‌مانیا یانێن ئورۆپا قاره‌مانێن خولا چامپیونز لیگ بهێنه ئه‌نجامدان و بڤی ره‌نگێ خارێ.
كۆما ئێكێ.
یاریگه‌ها ئیتحاد دێ دیداره‌كا ب هێز ل ده‌مژمێر 10ی شه‌ڤ خودانێن ئه‌ردی مانچسته‌ر ستی یا نئگلێزی و لایبزك یا ئه‌لمانی مێڤان دكه‌ت، مان ستی ب سه‌ركێشیا ستێرێن خوه ره‌حیم سترلینگ، گۆندۆگان، كیڤین دی برۆین و تورێس گه‌شبینن ئێكه‌م سێ خالان بده‌ستڤه بینن لێ لایبزیك ژ تیمێن ب سانه‌هی نابیت بۆ ژ ده‌ستدانا خالان، ژلایه‌كێ دووڤه پاریس سانجێرمان ب هیڤیێن مه‌زن ده‌ست یاریا خوه كه‌ت به‌ره ب ناسناڤێ ئێكی ب هێزه‌كا نوو و سه‌ركێشیا ستێرێن خوه لیونێل مێسی، مباپی، نه‌یمار و رامۆس بنه مێڤانێن گران بۆ یانا كلۆپ برۆچ یا نه‌رویچی، د مێژوویا یاریێن واندا شه‌ش جاران هه‌مبه‌ری ئێك بووینه پێنچ سه‌ركه‌فتن بۆ پاریسێ و وه‌كهه‌ڤیه‌ك.
كۆما دویێ.
ئێك ژ یاریێن دی یێن بهێز ئه‌ڤرۆ ده‌مژمێر ده‌هی شه‌ڤ بهێته كرن ده‌مێ یانا لیڤه‌رپۆل یا ئنگلێزی مێڤانداریا هه‌ڤڕكا خوه ئه‌ی سی میلان یا ئیتالی ل یاریگه‌ها ئانفێلد دكه‌ت، هه‌ردو یانه ب ئارمانجا ڤه‌گه‌ڕاندنا هێزا خوه دناڤ چامپیونز لیگێ دا به‌رهه‌ڤن، خودانێن ئه‌ردی شیایه شه‌ش ناسناڤان بده‌ستڤه‌بینت هه‌مبه‌ری وێ میلان خودانا حه‌فت ناسناڤایه، بتنێ دو جاران هه‌مبه‌ری ئێك بووینه د چامپیونزێ دا ئه‌وژی دیاریا دووماهیێ دابوون، ل سالا 2005ێ لیڤه‌رپۆل شیابوو ب لێدانێن په‌نه‌لتیێ ناسناڤی ب ده‌ستڤه بینت پشتی یاری ب سێ گۆلان وه‌كهه‌ڤبووین، وه‌رزێ 2007ێ لیڤه‌رپۆلێ تۆلێن خوه ڤه‌كربوو و شیا ناسناڤی لسه‌ر كیستێ وێ بینت، یاریا دویێ یا ڤێ كۆمێ ئه‌تله‌تیكۆ مه‌درید د هه‌مان ده‌م دا دێ مێڤانداریا پورتۆ یا پورتۆگالی كه‌ت ئێك ژ یاریێن دی یێن بهێز، تۆمارا یاریێن دناڤبه‌را هه‌ردو تیما یه‌كسانی بوویه ئانكو ژ شه‌ش یاریان دو سه‌ركه‌فتن بۆ هه‌ر تیمه‌كێ و دو خوساره‌تی بووینه.
كۆما سێیێ.
یانا برۆسیا دورتمۆند یا ئه‌لمانی ب ژڤانه ئه‌ڤرۆ ده‌مژمێر 7:45 شه‌ڤ ده‌ست ب ڤه‌گه‌ڕاندنا هیڤیێن ده‌ستڤه‌ئینانا ناسناڤی بكه‌ت پشتی دووركه‌فتنێ بۆ ماوێ 14 سالان كو ئێكه‌م جار بوویه قاره‌مانا چامپێۆنزێ بوون،دیاریا ئه‌ڤرۆ دا دێ بیته مێڤانا پیشكتاش یا توركی ئه‌وا خه‌وان بۆ قۆناغێن دووماهیێ دبینت، چار یاریزانێن دورتمۆند ژبه‌ر هنگاڤتنێ به‌رهه‌ڤ نابن ئه‌وژی زورگان هازارد، جیۆڤانی رینا، ئیمری تیشان و نیكۆ شۆلز،دێ پشتبه‌ستن لسه‌ر ستێرا خوه ئیرلینگ هالاند، هۆلمێز، رافائێل جوریرۆ و جولیان بڕاند كه‌ت، یاریا دویێ یا ڤێ كومێ دێ دناڤبه‌را سپۆرتین له‌شبۆنا یا پورتۆگالی و ئه‌یاكس ئه‌مستردام یا هۆله‌ندی بیت خودانا چار ناسناڤێن چامپیۆنزێ، یاری ده‌مژمێر 10ی شه‌ڤ ل یاریگه‌ها خۆسێ ئه‌لفالادی ل پۆرتۆگالێ هێته كرن.
كۆما چارێ.
ژ گرنترین یاریێن ئه‌ڤرۆ ده‌مژمێر 10ی شه‌ڤ یاریگه‌ها سان سیرۆ یانا ئه‌نتر میلان یا ئیتالی دێ مێڤانداریا هه‌ڤڕكا خوه و به‌ربژارا ناسناڤی ریال مه‌درید كه‌ت، هه‌ردو یانه بتنێ دو جاران هه‌مبه‌ری ئێك بووینه كو ب سه‌ركه‌فتنا رێالێ بوویه ئه‌وژی ل وه‌رزێ بوری یێ قۆناغا كۆمان دا، پێنچ یاریزانێن ریالێ پشكدار نابن ئه‌وژی گاریس بێل، دانی سیبایۆس، تۆنی كروز، فێرلاند مێندی و مارسێلۆ، هه‌مبه‌ری وێ پشكداریا ستێرا ئه‌نتر سینسی د گۆمانێ دایه و ڤه‌گه‌ڕیانا ئه‌لیساندرۆ باستۆنی هێز دایه خودانێن ئه‌ردی، ژلایه‌كێ دووڤه و ده‌مژمێر 7:45 شه‌ڤ شاختار دۆنێسك یا ئوكرانی دێ بیته مێڤانا شیریف تراسبۆل یا مۆلدیڤیایێ ئه‌وا بۆ جارا ئێكێ یه پشكداری چامپیۆنزێ بیت.
