ئه‌ڤرۆ چێلسی و یوڤانتۆس ژ گرنترین دیدارێن چامپیۆنزێ یه
ئه‌ڤرۆ
دهێته چاڤه‌ڕێكرن ئه‌ڤرۆ ب شه‌ڤ هه‌شت یاریێن دی یێن گه‌ڕا دویێ ژ چارچووڤێ قۆناغا كۆما یا قاره‌مانیا یانێن ئورۆپا قاره‌مانێن خولا چامپیونز لیگ یا ته‌پا پێی ب هێنه ئه‌نجامدان و یۆڤانتۆس و چێلسی كۆپیتكا یاریێن ڤێ گه‌ڕێ دا هه‌مبه‌ری ئێك بن.
كۆما پێنجێ.
یانا بایرن مێونخ یا ئه‌لمانی ئێك ژ به‌ربژێرن ب هێز بۆ ناسناڤێ چامپیۆنز دێ مێڤانداریا دینامۆكێڤ یا ئوكراین كه‌ت ب ئارمانجا مسۆگه‌ركرنا سێ خالێن دی، یانا بافاری پشت گه‌رمیا سه‌ركه‌فتنا مه‌زن هه‌مبه‌ری به‌رشه‌لۆنا و سه‌رێ لیستا كۆما خوه و خولا ئه‌لمانی دێ هێـه دناڤ یاریگه‌هێ دا، ئانكۆ پێشه‌نگه ل چامپیۆنزێ و خولێ دا له‌ورا راهێنه‌رێ وێ ناجلسمان ڤێ ده‌لیڤێ ژ ده‌ست ناده‌ت بۆ جهئینانا ئارمانجێن خوه ئه‌وژی ده‌ستڤه‌ئینانا ناسناڤێ حه‌فتێ، ژلایێ خوه‌ڤه یانا ئوكراین تیمه‌كا ب گه‌نجه و سه‌ركێشا خولا وه‌لاتێ خوه دكه‌ت، دبیت چوونا راهێنه‌رێ وێ شفشینكۆ و هاتنا لۆشیسكۆیی گوهۆرین ل سه‌ر پلانێن وان بهێنه كرن وببنه ئاسته‌نگ بۆ بایرن میونخێ، د یاریه‌كا دی دا یانا به‌رشه‌لونا پشتی چوونا ستێرا وێ لیونێل مێسی ئه‌و ئاستێ چاڤه‌ڕێكری د خول و چامپیۆنز دا نه هاتیه دیتن و خوساره‌تیا وێ هه‌مبه‌ر مێونخێ ئه‌ركێ وێ دیاریا ئه‌ڤ شه‌ڤه دا زه‌حمه‌تر لێكریه ده‌مێ دبیته مێڤانا به‌نڤیكا یا پورتۆگالی ئێك ژ یانێن بهێز دخولا وه‌لاتێ خوه دا كو سه‌رێ لیستێ دهێت و خودان كۆمه‌كا یاریزانێن شاره‌زایه هه‌ڤڕكیا ده‌ستڤه‌ئینانا سێ خالان دێ با بهێزبیت، به‌رشه‌لۆنا د مه‌ترسیا دووركه‌فتنێ دایه هه‌كه‌ر تووشی خوساره‌تیێ بوو، هه‌ردو یاری ده‌مژمێر 10ی شه‌ڤ هێنه ئه‌نجامدان.
كۆما شه‌شێ.
یانا مانچسته‌ر یۆنایتد یا ئنگلێزی دێ مێڤانداریا یانا فیاریال یا ئسپانی كه‌ت د یاریه‌كا بهێزدا و ڤه‌گه‌ڕیان بۆ ناڤ هه‌ڤڕكیێن قاره‌مانیێ دا پشتی د یاریا ئێكی دا ل گه‌ل یۆنگ بۆیز یا سویسری تووشی خوساره‌تیه‌كا نه‌چاڤه‌ڕێكری بووی ب دو گۆلان به‌رامبه‌ر گۆله‌كێ، خودانێن ئه‌ردی رژدن سه‌ركه‌فتنا ئێكی تۆماربكه‌ن تایبه‌ت پشتی هاتنا ستێرا پورتۆگال كریستیانۆ رۆنالدۆ، رافائێل ڤاران، جادۆن سانشۆ و تۆم هێتۆن لێ ئه‌نجامێن یاریێن ڤێ دووماهیێ دلخووشكه‌ر نه‌بووینه ژ كاسا ئنگلێزی گه‌ل وێستهام و ئاستۆن ڤێلا ژ پرێمه‌رلێگ، یاریزان داخوازكرینه ژبۆ ئاشتكرنا جه‌ماوه‌ری و ڤه‌گه‌ریانا زلهێزیا مان یۆنایتد د چامپیۆنزێ دا، هه‌ردو تیم ل 26ێ گۆلانا بوری د یاریا دووماهیا خولا ئورۆپا هه‌مبه‌ری ئێك بووینه ئه‌وا مان یونایتد ناسناڤ بده‌ستڤه‌ئینایی پشتی وه‌كهه‌ڤبووین ب گۆله‌كێ د لێدانێن په‌نه‌لتیا ئێكلاكربوو، له‌ورا یانا ئسپانی سه‌نگا هه‌ڤڕكا خوه دزانیت ب هێز و كێماتیێن وێ ڤه و دێ بزاڤێ كه‌ت ب ئه‌نجامه‌كێ باش ژ یاریگه‌ها وێ ڤه‌گه‌ریێت.
كۆما حه‌فتێ.
یانا سیڤییا یا ئسپانی هه‌مبه‌ری ده‌لیڤه‌كا زێرینه بۆ ب ده‌ستڤه‌ئینانا سێ خالێن یاریێ ده‌مێ دبیته مێڤانا یانا فۆلفسبۆرگ یا ئه‌لمانی تایبه‌ت پشتی هاتیه راگه‌هاندن كو یانا فۆلفسبۆرگ دێ بێ به‌هربیت ژ پێنچ یاریزانێن خوه یێن سه‌ره‌كی ئه‌وژی برۆكس، ئكسافێر شلاكر، بارتسۆز بیاكچی،پاولۆ ئۆتاڤیۆ وێلیام ئه‌وێن كاریگه‌رن بۆ تیمێ، د یاریێن ئێكێ یێن ڤێ كۆمێ دا هه‌ردو تیم ل گه‌ل هه‌ڤڕكیێن خوه ب خاله‌كێ رازیبوون، ئانكۆ ئه‌ڤ كۆمه هه‌رچار تیمان خاله‌ك یا هه‌یی و ده‌لیڤه بۆ هه‌موو تیما هه‌یه ژبۆ پلێتا ده‌ربازبوونێ، ژلایێ خوه‌ڤه لیل یا فره‌نسی دێ بیته مێڤانا رێد بۆل سالزبۆرگ یا نه‌مسا كو هه‌ردو تیم هیڤیێن سێ خالان هه‌نه.
كۆما هه‌شتێ.
ئێك ژ گرنترین یاریێن بهێز یێن ئه‌ڤ شه‌ڤه كو جه‌ماوه‌رێ وه‌رزشی چاڤه‌ڕێ بیت دناڤبه‌را دو زلهێزێن كێشوه‌رێ ئورۆپا ده‌مێ یانا یۆڤانتۆس یا ئیتالی مێڤانداریا چێلسی یا نگلیزی دكه‌ت ئه‌وا دێ ل ده‌مژمێر ده‌هی شه‌ڤ هێته كرن و هه‌ردو تیما ئارمانجا سه‌رێ لیستا كۆما خوه دڤیت، خودانێن ئه‌ردی ژ سه‌ركه‌فتنه‌كا مه‌زن و ڤه‌گه‌ڕیانه‌كا بهێز دێ هێته دناڤ یاریگه‌هێ دا، د خولا ئیتالیا دا دو سه‌ركه‌فتن لدووڤ ئێك لسه‌ر یانێن سیبیزیا و سامبدۆریا تۆماركرینه و د چامپیونزێ دا یاریا خوه یا ئێكێ ب سێ گۆلان سه‌ركه‌فت بوو لسه‌ر مالمۆ یا سویدی ئه‌ڤ ئه‌نجامه پالده‌ره بۆ به‌رده‌وامیا پاراستنا سه‌رێ لیستا كۆمێ، سه‌رباری نه‌پشكداریا هه‌ردو ستێرێن وێ دیبالا و مۆراتا ئه‌وێن تووشی هنگاڤتنێ بووین لێ فێدریكۆ برنادسكی، مۆیس كین، فێدریكۆ كێیزا و لوكاتێلی شیانێن تۆماركرنا گۆلان هه‌نه، هه‌مبه‌ری وێ یانا چێلسی ئه‌وا د یاریا بوری دا ژ خولا ئنگلێزێ ل گه‌ل هه‌ڤڕكا خوه مان ستی تووشی خوساره‌تیێ بووی ب گۆله‌كێ دێ بزاڤێ كه‌ت ئه‌وێ شكه‌ستنێ دیاریا ئه‌ڤ شه‌ڤه دا قه‌ره‌بووكه‌ت و سه‌رێ لیستێ وه‌ربگریت و پشت گه‌ڕمیا وێ دێ ب شاره‌زاهیا یاریزانێن خوه رۆمێلۆ لۆكاكۆ، تیمۆ فێرنێر، كۆڤاتێچ، كانتی و جورجینیۆ بیت، بۆ زانین دیرووكا یاریێن واندا چار جارا هه‌مبه‌ری ئێك بووینه دو وكهه‌ڤی و هه‌ر ئێك سه‌ركه‌فتنه‌ك، د هه‌مان كۆم دا زێنێت سانت پترۆس یا رۆسیا مێڤانداریا مالمۆ یا سویدی ده‌مژمێر 7:45 شه‌ڤ كه‌ت، هه‌ردو تیم د یاریا ئێكی دا تووشی خوساره‌تیێ بوون یاریا ئه‌ڤرۆ ئێكلاكه‌ره بۆ هه‌ڤڕكیا سێ خالان و گه‌شكرنا هیڤییا بۆ قۆناغا دویێ.
