ئه‌ڤرۆ گۆڕه‌كێ هێمایی بۆ ئه‌رده‌وان زاخۆیی دێ هێته دانان و په‌رده ل سه‌ر په‌یكه‌رێ وی یێ ئه‌یاز یوسف هێته لادان
دهۆك، شاكر ئه‌تروشی:
رێڤه‌به‌ریا ره‌وشه‌نبیری و هونه‌ری ل زاخۆ، ب هه‌ڤكاری ل گه‌ل سه‌ندیكا هونه‌رمه‌ندان ل وی باژێری، ل به‌ره ئه‌ڤرۆ ل ده‌مژمێر پێنجی ئێڤاری درێ و رسمه‌كێ ژ هه‌ژی دا ل گۆره‌پانا پرا ده‌لال په‌ردێ ل سه‌ر په‌یكه‌رێن هه‌ردو هونه‌رمه‌ندێن ناڤدارێن وی باژێری (ئه‌رده‌وان زاخۆیی و ئه‌یاز یوسف) ئه‌و ژی پشتی كو دوباره هاتینه راكه‌ن و ینه‌مالێن هه‌ردو هونه‌رمه‌ندان ل گه‌ل هژماره‌كا زۆرا هونه‌رمه‌ند و حه‌زژێكه‌رێن ده‌نگێ وان ل وێرێ دحازربن.
دلخاز موسا، رێڤه‌به‌رێ رێڤه‌به‌ریا ره‌وشه‌نبیری و هونه‌ری ل زاخۆ، ل دۆر دوباره دانانا ڤان په‌یكه‌ران بۆ ئه‌ڤرۆ گۆت: ئه‌ڤ هه‌ردو په‌یكه‌ره ئه‌و بوون یێن به‌ری چه‌ند سالا ل باغچێ به‌رامبه‌ر پرا ده‌لال هاتینه دانان، لێ پشتی به‌فره‌هكرنا وێ جادێ و راكرنا باغچه‌ی ئه‌و هه‌ردو په‌یكه‌ر ژی هاتنه راكرن و ب شێوه‌كێ به‌روه‌خت مه ڤه‌گوهاستبوونه گۆره‌پانا رێڤه‌به‌ریا ره‌وشه‌نبیری و هونه‌ری ل زاخۆ و نوكه ده‌م هات جاره‌كا دی دانینه ڤه، لێ بۆ ئه‌ڤ جاره گۆره‌پانا پرێ ب خوه هاته هه‌لبژارتن و پشتی نووژه‌نكرنا وان ژلایێ هونه‌رمه‌ندێ په‌یكه‌رساز (دلێر كامیران) ڤه، دوباره ئه‌ڤرۆ دێ هێنه دانان، لێ به‌ری راكرنا په‌ردێ ل ده‌مژمێر چاری ئێڤاری دێ گۆره‌ك وه‌ك هێمایی ل ناڤ گۆرستنانا زاخۆ بۆ بێ سه‌روشینیا ئه‌رده‌وانی هێته دانان و ل ده‌مژمێر پێنج دێ په‌رده ل سه‌ر په‌یكه‌رێن هه‌ردویان هێته لادان و هنده‌ك سترانێن وان هه‌ردو نه‌مران دێ ژلایێ گرۆپه‌كێ كۆرال ڤه هێنه گۆتن و هه‌رده‌م ئه‌ز دبێژم هندی ئه‌م بۆ ڤان هه‌ردو هونه‌رمه‌ندان بكه‌ین هێشتا یا كێمه چنكو ئه‌یاز و ئه‌رده‌وان سومبۆلا زاخۆ و هه‌موو كوردستانێ نه.
ژلایێ خوه ڤه په‌یكه‌رساز (دلێر كامیران) ژی گۆت: ئه‌ڤ په‌یكه‌ره ل سالا 2008 مه چێكربوون، و ل 21/1/2009 هاتبوونه دانان، لێ دیاره ژ به‌ر بۆرینا ده‌می و گوهۆرینا سه‌قای وه‌كو خوه نه‌مابوون، له‌ورا به‌ری دانانا وان ل گۆره‌پا پرێ جاره‌كا دی ئه‌م ب كارێ نووژه‌نكرنا وان رابووین و كوالیتیه‌كا باشتر هاتنه سه‌خبێركرن و تێچوویێ نووژه‌نكرنێ باژێرڤانیا زاخۆ پێ رابوویه، بۆ زانین بلنداهیا هه‌ر په‌یكه‌ره‌كی دو مه‌تر و(40) سه‌نتیمه‌تره، بنكێ وانژی دو مه‌ترن.
