ئه‌ڤه مابوو مه نه دیتی
حه‌تا نۆكه مه دزانی په‌رله‌مان جهێ شه‌ڕه‌ده‌ڤێت قانوینیه. حه‌تا هنده‌جارا گه‌هشتیه لێكخۆڕینا ب له‌پ و مستا. به‌لێ كو ڤێ دویماهیێ سه‌رۆكێ په‌رله‌مانی ژ وه‌زیرێ پێشمه‌رگه‌ی داخازا 111 كلاشینكوڤا و وه‌روه‌را (ریڤۆلڤه‌را) كری سیناریۆیه‌كا دی دناڤ مه‌ژیێ مه‌دا بۆ هه‌دامێت ژ ملله‌تی دترسن ژه‌نی.
دێ تمامتر لێهێت هه‌كه سه‌رۆكێ هێژایێ په‌رله‌مانی داخازا كڕینا هه‌سپا و نادیه‌كا هه‌سپسوییاریێ ژی بۆ هه‌دامێت لدویڤ تا و رێزێت خۆ بكه‌ت و هنده‌ك زین و پاشه‌زینكێن گاڤانێن ئه‌مریكی په‌یداكه‌ت و هه‌رئێكه‌كی شه‌لیته‌كا درێژ د سه‌مه‌را زینێ هه‌سپێ وی دانیت، دا ئالیگرێن هێژایێ سه‌رۆكێ په‌رله‌مانی هه‌كو پێدڤی ده‌نگێن خه‌لكێ ببن، ل هه‌سپێت خۆ سوییارببن و داكه‌ڤنه ناڤ باژێڕێ هه‌ولێرێ و ئاوازێت زنجیرا فلمێت (مارشالی) لێده‌ن و سترانا فلمی بۆ دبه‌ڕا بێژن و بێژن: ((هۆۆۆ رینگۆ رینگۆۆۆ.. . ) و ب هه‌سپێن خۆ ل ناڤ جاددێن پایته‌ختێ جدیدانێ بكه‌ن و وه‌كی بڕێت زه‌لامێت فلمێت كاوبۆی هه‌كو گه‌هشتنه ناڤ باژێڕی شێلكه‌كا ته‌قێ بكه‌ن دا خه‌لك بزانن ئه‌ڤه بڕا كاوبۆیێن (گۆڕانێ) هاتن و سه‌هم بكه‌ڤیته سه‌ری و وه‌ریسی باده‌ن و پاڤێژنه ستۆیێ هه‌ولێریه‌كی ئان هه‌ر كه‌سێ ده‌ستكه‌ڤت و هه‌كو وه‌ریس كه‌ته ستۆی بكێشنه به‌ر سینگێ خۆ و قونتاخا وه‌روه‌رێ ل پشتا پاتكا وی بده‌ن و زێره‌ڤانێن وی پێ خۆ داننه سه‌ر سه‌ری و ل تره‌قینێن كه‌نی دبه‌ن.
ئه‌ڤا سه‌ری كه‌نیگریه، به‌لێ یا بهێت خه‌مه. خه‌م ژی ئه‌وه وه‌زیره‌ك ل به‌ردهێت وێ داخازیێ بۆ سه‌رۆكێ په‌رله‌مانی بجهبینیت و بایێ (500 پێنجسه‌دهزار دۆلارا) چه‌كێن داخازكری و جه‌بلخانێ بده‌تێ. ئه‌ز دێ ڤان پسیارێن ساده ژ هێژایێ وه‌زیر كه‌م: (ئه‌رێ ده‌مێ ته ئه‌و داخازی ئیمزاكری، نه‌هاته به‌ر هزرا ته پاراستن و چه‌ككرنا مرۆڤێن مه‌ده‌نی ل ناڤ رێڤه‌به‌ریه‌كێ كارێ وه‌زاره‌تا ناڤخۆیه و هه‌دامێ په‌رله‌مانی ژ (گۆڕانێ) به‌ری تۆ تڤه‌نگه‌كێ ب ملی ڤه‌كه‌ی و وه‌روه‌ره‌كێ ب تلی ڤه‌كه‌ی مرۆڤه‌كێ مه‌ده‌نیه و شولێ وی قانوین ژه‌نینه نه‌كو ته‌قه‌ڕه‌ق و وه‌روه‌ره و كلاشینكۆڤن؟ ئان ئه‌ڤه‌یه ئه‌و گۆهڕین یا گۆڕان لناڤ جڤاكێ كوردستانێ دكه‌ت؟!!!! ئه‌رێ ما ته نه‌دزانی كارێ پاراستنا په‌رله‌مانی شولێ وه‌زاره‌تا ناڤخۆیه و هه‌كه وێ كێماسی د پاراستنێ دا دیت، هینگێ دشێت داخازا هاریكاریێ ژ وه‌زاره‌تا پێشمه‌رگه‌ی بكه‌ت و پێشمه‌رگه تنێ پشتی ل به‌رهاتنا په‌رله‌مانی و سه‌رۆكێ هه‌رێمێ دشێت ب چه‌ك و جه‌بلخانه‌ڤه بكه‌ڤیته ناڤ جاددێن باژێڕا و وه‌زاره‌تا ناڤخۆیا كوردستانێ د كارێ خۆدا گه‌له‌كا سه‌ركه‌تیه.
سه‌یدایێ وه‌زیر جه‌نابێ ته ژ من باشتر دزانیت، وه‌زیرێ له‌شكه‌ری (ل كوردستانێ وه‌زیرێ پێشمه‌رگه‌ی) ده‌مێ چه‌كی لناڤ جڤاكێ مه‌ده‌نی به‌لاڤدكه‌ت، تێكشێلانه‌كا د سه‌ریدا. باشه هه‌كه سبه‌هی ب وێ وه‌روه‌را ته بۆ هه‌دام په‌رله‌مانی هنارتی ئێك هاته كوشتن، بناسێت كێنه ئانكو كی گونه‌هباره!!
باشه سه‌یدایێ وه‌زیر، ما هه‌كه سه‌رۆكێ په‌رله‌مانی نه‌زانیت كی ژ پاراستنا وی به‌رپرسه، تۆ ژی ده‌ستهه‌لاتێت خۆ نزانی؟ ما تۆ نزانی كارێ پێشمه‌رگه‌ی پاراستنا تخویبێت كوردستانێیه ژ دۆژمنه‌كێ ژ ده‌رڤه‌بهێت، وه‌كی ترك، فارس و عه‌ره‌با؟
باشه سه‌یدایێ سه‌رۆكێ په‌رله‌مانی، ما ته باوه‌ری ب وی كه‌سی ناهێت یێ ده‌نگێ خۆ دایه ته و هاژۆتیه دبن گۆمبه‌تا په‌رله‌مانیڤه و ڤێجا كلاشینكوڤ و وه‌روه‌را ل دژی وی بخۆ ڤه‌كه‌ی، ئان ته ئنیه‌ته هه‌كه جاره‌كێ د په‌رله‌مانیڤه بایێ جۆخوینا ته نه‌هات، دێ ئیرادا ملله‌تی د كۆچكا په‌رله‌مانیڤه شكێنی و شه‌رعیه‌تا تڤه‌نگێ چێكه‌ی؟
سه‌یدایێ سه‌رۆكێ په‌رله‌مانی؛ باشه ما پشتی داعش شكه‌ستی و ژ مه‌خمورێ دویركه‌تی و ناڤبه‌را 35 حه‌تا 40 كلم ژ كه‌ركویكێ هاتیه دویرئێخستن و فڕۆكێت هه‌ڤالبه‌ندێت دژی ده‌وله‌تا ئیسلامی حالێ وان كریه حالێ زه‌مبیلفرۆشی، ما وه‌روه‌ره و كلشینكۆڤ د په‌رله‌مانیڤه بۆ چنه؟
