ئه‌ڤ رۆبۆته دشێت سۆریلانکی بۆ دەمێ نه‌هـ هه‌یڤان د له‌شێ خوه دا ب خودان بكه‌ت
سندس سالح:
د پێشکەفتنەکا بێ وێنه دا، د وارێ تەکنۆلۆژیایێ دا، چینێ ئاشکرا کر کو وان رۆبۆته‌ك دروستکریە دشێت دوگیان ببیت و زارۆیان بینیت. ئەڤ رۆبۆتە، ب گۆرەیی راگەهاندنێن چینی، دشێت كورپه‌له‌یی بۆ ماوێ نه‌هـ هەیڤان هەلبگریت، هەر وەکو ژنا دوگیان.
ئەڤ رۆبۆتە هاتیە دیزاینکرن ب رێیا تەکنۆلۆژیا پێشکەفتی یا زیرەکیا دەستکرد و ناڤەرۆکێن زیندی یێن چێکری. له‌شێ رۆبۆتێ هاتیە دروستکرن ژ ماددێن تایبەت یێن کو دشێن رێ خۆشكه‌ر بن بۆ گەشەکرنا دوگیانیێ و پاراستنا وێ. هەروەسا ئەڤ رۆبۆتە خودان سیستەمەکێ تایبەت یێ خوینێ و هۆرمۆنان، کو هاریکاریا گەشەکرنا دوگیانیێ دکەت.
زانایێن چینی دبێژن کو ئەڤ پێشکەفتنە دشێت ببیتە رێچارەیه‌ک بۆ کێشەیا کێمبوونا ژمارا زارۆیان ل چینێ و بلندکرنا رێژا زارۆبوونێ. ئەو دبێژن کو ئەڤ رۆبۆتە دشێت هاریکاریا وان کەسان بکەت یێن کو ژ بەر ئەگەرێن ساخله‌میێ نەشێن زارۆیان بینن، یان یێن کو ناخوازن ب دوگیان بکەڤن لێ دخوازن زارۆیێن وان ژ ژنێن وان ب خوه بن.
هەروەسا، ئەڤ پێشکەفتنە رێیەکێ ڤەدکەت بۆ ڤه‌كۆلینێن زانستی ل سەر گەشەکرنا كورپه‌له‌یی و ئەو گۆهۆرین یێن کو د ماوێ دوگیانبوونێ دا په‌یدا دبن، بێی کو پێدڤی ب ڤه‌كۆلینێن ل سەر مرۆڤان هەبیت.
لێ ئەڤ پێشکەفتنە گەلەک پرسیارێن ئەخلاقی و یاسایی ژی پەیدا دکەت. گەلەک زانا و بسپۆرێن ئەخلاقی دبێژن کو پێدڤیە سنور بۆ ڤێ تەکنۆلۆژیایێ بهێنە دانان، پێدڤیە یاسایێن تایبەت بهێنە دانان بۆ چاڤدێریکرنا ڤی واری.
هەروەسا، گەلەک کەس دترسن کو ئەڤ تەکنۆلۆژیا ببیتە سەدەما کێمبوونا گرنگیدانێ ب ژنان و رۆلێ وان د چێکرنا خێزانێ دا. ئەو دبێژن کو پێدڤیە گەلەک ب باشی ڤه‌کۆلین ل سەر کاریگەریێن ڤێ تەکنۆلۆژیایێ ل سەر جڤاکی بهێنە کرن بەری کو بڕیار ل سەر بکارئینانا وێ بهێتە دان.
د هەمان دەم دا، زانایێن چینی دبێژن کو ئەڤ تەکنۆلۆژیا هێشتا د دەستپێکێ دایە و پێدڤی ب گەلەک ڤه‌کۆلینێن دی هەیە بەری کو بهێتە بکارئینان ل سەر ئاستەکێ بەرفرەهـ. ئەو دبێژن کو ئارمانج ژ پێشڤەبرنا ڤێ تەکنۆلۆژیایێ هاریکاریکرنا مرۆڤایەتیێ یە، نەک جهگرتنا ژنان.
ئەڤ پێشکەفتنە نیشان ددەت کا چاوا تەکنۆلۆژیا دشێت سنورێن جیهانا مە بگۆهۆریت و رێیێن نوو ڤەکەت بۆ چارەسەرکرنا ئاریشێن کو هەتا نها بێ چارەسەری مایین.
