ئهڤ ساله تهرش و كهوال دهرڤه نههاتیه دهۆكێ
ئهڤرۆ، سالار دۆسكی:
رێڤهبهرێ گشتیێ چاندنێ ل دهۆكێ ئاشكراكر كو ئهڤ ساله تهرش و كهوالێ ناڤهراست و باشورێ عیراقێ قهدهغهكریه. ل بهرامبهر خهلكێ گوندێن دهڤهرا دۆسكیا ئاشكرا دكهن كو تهرش و كهوال و ههتا حێشتر ژی هاتینه دهڤهرێ.
بابێ ههژار، وهلاتیهكێ گوندێ باجلورێ یه، ل دور هاتنا تهرش و كهوالی بۆ دهڤهرێ بۆ رۆژناما ئهڤرۆ دیار كر، ئهڤ ساله رێژهكا مهزن یا تهرش و كهوالێ عهرهبان هاتیه گوندێ باجلورێ و ههتا حێشتر ژی ل گهل خوه ئیناینه و چ چهره بۆ تهرش و كهوالێ گوندی نههێلا و كارتێكرن ل سهر تهرشێ گوندی ههیه.
عهبدوللا موسی یوسف، خهلكێ گوندێ حوجاڤایه دیار كر، ئهڤ ساله تهرش و كهوال هاتیه گوندێ حوجاڤا و دو كهرێن پهزی هاتینه گوندێن (دێركێ، بروحهجهرا، بابوخكێ، شاوریكێ) و گهلهك كارتێكرن ل سهر تهرش و كهوالێ خهلكێ دهڤهرێ كریه وهك ئهرزانكرنا شیری و پهنیری و دیسا بوویه ئهگهرێ بلندبوونا بهایێ عهرهبانا كایێ ژ 100 هزار دیناران بۆ 300 هزار دیناران و دیسا چهروانێ دهڤهرێ ژی گهلهك كارتێكرن ل سهر كریه.
كوڤان بلال، موختارێ گوندێ باجلورێ یه دیار كر، پتر ژ 15 سالانه تهرش و كهوالێ عهرهبان ل دهڤهرێ یه و چ كارتێكرن ل سهر دهڤهرێ نهكریه و ههمان دهم خهلكێ گوندی پهزهكێ كێم ههیه و كارتێكرنا وی یا ب وی رهنگی نینه وهك خهلك هزر ژێ دكهت.
موختارێ گوندی ئهو ژی گۆت: حوكمهت ناهێلیت رهزێن خوه سیمه بكهین، مه داخاز ژ وان عهرهبان كریه ب زووترین دهم ئاژهلێ خوه ببنه گوندهكێ دی.
ئهندازیار ئهحمهد جمیل ئهبو زهید رێڤهبهرێ گشتیێ چاندنێ ل پارێزگهها دهۆكێ بۆ رۆژناما ئهڤرۆ دیار كر، ملیونهك و 900 سهرێن پهزی ل پارێزگهها دهۆكێ ههنه و باشتره ژ سالا بوری و ب تنێ ل دهڤهرا سێمێلێ رهوش یا باش نهبوو، چونكو باران نهبوون و ب چ رهنگان مه نههێلا ئاژهلێ عهرهبان بهێته پارێزگهها دهۆكێ، چونكو مه ڤیا ئهو چهر بۆ تهرش و كهوالێ كوردستانێ بیت و ئهڤ كاره ل گهل فهرمانگههێن پێدڤی هاتهكرن و سالێن هشكهسالیێ تهرش و كهوالێ عهرهبان گهلهك ژ پارێزگههێن باشور و ناڤهراست دهاته پارێزگهها دهۆكێ.
