ئه‌ڤ ساله زیانێن مه‌زن ب خودانێن كێلگه‌هێن په‌له‌وه‌ران كه‌فتینه
هه‌ولێر، سولین سلێمان
خودانێن كێلگه‌هێن په‌له‌وه‌ران وه‌كی ئه‌و ب خوه دبێژن د ئه‌ڤ ساله‌دا زیانه‌كا زۆر كرینه، ئه‌گه‌رێ وێ ژی هاتنه خارا بهایێ مریشكانه.
ئه‌و د دلگرانن ژبه‌ر گرانیا بهایێ كه‌ل و په‌ل و پێدڤیێن مریشكان، ژبه‌ر وێ ئه‌گه‌رێ زیانێن وان پتر بووینه ژ قازانجێن وان. نازم عه‌بدوڵا سه‌رۆكێ كومه‌ڵا كێڵگه‌هێن په‌له‌وه‌ری ل هه‌رێما كوردستانێ بۆ رۆژناما ئه‌ڤرۆ دیاركر؛ زیانێن ئه‌ڤ ساله یێن خودان كێلگه‌هێن په‌له‌وه‌ران نه ب تنێ ماددی بووینه، به‌لكو ژ لایێ ده‌روونیڤه ژی كارتێكرن هه‌بوویه ل سه‌ر ده‌روونێ وان، چه‌ند ژ وانا مال مولكێن خوه ژ ده‌ست داینه. نازم عه‌بدوڵا ئاشكرا ژی كر؛خودان كێلگه‌هێن په‌له‌وه‌ران ب تنێ د ئه‌ڤ ساله دا پتری ١٥٠ ملیار دیناران زیان هه‌بووینه.
ئاماژه كر؛ تێچوویا به‌رهه‌مئینانا مرشكان ل سه‌ر خودان كێلگه‌هێن په‌له‌وه‌ران زێده بوویه، چونكی ئه‌گه‌ر ژ خار سێ هزار دیناران مریشكان بفروشن دێ تووشی زیانان بن، ئه‌ڤ چه‌نده ژی دێ بیته ئه‌گه‌را وێ كۆ دووباره زیانا بكه‌ن، ئه‌گه‌ره‌كێ دی ژی ئه‌وه هه‌موو پێكڤه مریشكان هاورده دكه‌ن، ئه‌ڤ چه‌نده ژی دێ بیته ئه‌گه‌رێ وێ بها بهێته خار.
ئه‌یوب جاسم خه‌لكێ پارێزگه‌ها هه‌ولێرێیه خودان ئێك ژ كێلگه‌هێن په‌له‌وه‌رانه ده‌رباری ڤێ چه‌ندێ بۆ رۆژناما ئه‌ڤرۆ گۆت ”ژبه‌ر كێمبوونا بهایی مریشكان من زیانه‌كا زۆر كریه و نه ب تنێ ئه‌زم، به‌لكو گه‌له‌ك كه‌سێن دی هه‌نه وه‌كی من تووشی ڤێ گرفتێ بووینه، ل كێلگه‌ها من دا پتر ژ ٥٠ كه‌سان كاردكه‌ن و و ئه‌م ل ڤێره ب تێچویه‌كا زۆر وان مریشكان خودان دكه‌ین و د ده‌مه‌كیدا قازانجێ مه ل دۆر ڤێ ماندی بوونێ نینه، ئه‌ز ب ڤی ره‌نگی نه‌شێم به‌رده‌وام بم، زۆر جاران هزر ژ ڤێ چه‌ندێ دكه‌م جهێ خو دابخه‌م، گوت ژی پێتڤیه حكومه‌ت ژ سه‌دێ ٦٠ باجێ ل سه‌ر مریشكێن به‌ستی دابنیت.
