ئه‌ڤ ساله كێمتر ژ پار گه‌شتیار هاتینه شكه‌فتا ئینشكێ
ئه‌ڤرۆ نیۆز،زنار تۆڤى:
شكه‌فتا ئینشكێ ئێك ژ وان جهێن گه‌شتیارى یێن سه‌رنجراكێش و هینه،له‌ورا سالانه رێژه‌یه‌كا باش یا گه‌شتیاران ژ هه‌رێما كوردستانێ و ل سه‌رانسه‌رى عێراقێ ژى سه‌ره‌دانا ڤێ شكه‌فتێ دكه‌ن ب مه‌ره‌ما گه‌شت و گۆزارى و دیتنا دیمه‌نێن وێ یێن جوان.
رێڤه‌به‌رێ شكه‌فتا ئینشكێ یا گۆزارى فه‌ریق سه‌برى سه‌لیم بۆ ئه‌ڤرۆ نیۆز دیاركر:ئه‌ڤ ساله كێمتر گه‌شتیار قه‌ستا شكه‌فتا ئینشكێ دكه‌ن ب مه‌ره‌ما گه‌شتكرنێ،هه‌ر چه‌نده پار پتر خه‌لكێ سه‌ره‌دانا ڤى جهى دكر،لێ ئه‌ڤ ساله وه‌كو دیار گه‌شتیارێن عه‌ره‌ب پتر قه‌ستا هه‌ولێرێ و سلێمانیێ دكه‌ن،ژبه‌ركو گه‌شتیار وه‌سا دده‌نه خویاكرن كو ئۆَتێل و جهێن ڤه‌حه‌وهانێ ل وێرێ ژ دهوكێ د ئه‌رزانترن،هه‌روه‌سا خزمه‌تگۆزاریا گه‌شتیارى ل هه‌ولێر و سلێمانیێ ژ دهوكێ باشتر و ب رێكوپێكتره،ناڤهاتى دیاركر ژى:به‌رى كو داعش هێرشێ بینیته سه‌ر عێراقێ و هه‌رێما كوردستانێ گه‌شتیارێن عه‌ره‌ب ب رێیا مۆسلێ دهاتنه كوردستانێ و بۆ وان دهوك یا نێزیك بوو،لێ پشتى هاتنا داعشا ئێدى گه‌شتیارێن عه‌ره‌ب پتر به‌رێ خوه دایه هه‌ولێرێ و سلێمانیێ،هه‌روه‌سا گه‌شتیاران ژى دایه دیاركرن كو نوكه دهوك بۆ وان دوور بوویه.
ناڤهاتى دیاركر ژى:نوكه گه‌له‌ك ژ وان كه‌سێن گه‌شتیارێن عه‌ره‌ب د ئیننه كوردستانێ و ب تایبه‌تى ل پارێزگه‌ها دهوكێ وه‌سا رێككه‌فتینه كو خودانێن هنده‌ك ئۆتێل و خوارنگه‌هان ل ده‌ڤه‌رێن جۆدا یێن دهوكێ پاران ده‌نه مه‌ندۆبێن وان كۆمپانیان،به‌رامبه‌ر هندێ كو ئه‌و مه‌ندۆبه گه‌شتیاران ببه‌نه ئۆتێل و خوارنگه‌هێن وان و ڤێ چه‌ندێ كارتێكرن ل كارێ مه كریه،له‌ورا ئێدى وه‌كى به‌رێ گه‌شتیار قه‌ستا شكه‌فتا ئینشكێ ناكه‌ن.
هێشتا دبێژیت:ئه‌ڤه چه‌ندین ساله ئه‌م د كه‌رتێ گه‌شتیارى كار دكه‌ین،لێ مه نه‌ڤێت ئه‌م ڤى كارى بكه‌ین،چونكى ئه‌ڤه دیارده‌كا كرێته و ئه‌ڤه دو ساله ئه‌ڤ دیارده ل دهوكێ په‌یدابووى،هه‌روه‌سا تاراده‌یه‌كێ ئه‌ڤێ چه‌ندێ كارتێكرنه‌كا خراب ل سه‌ر مه كریه،دیسا رۆژانه رێژه‌یه‌كا باش یا گه‌شتیاران دهێنه ده‌ف مه ژى،چونكى ئه‌ڤ جهه زۆر یێ خۆش و هینه و ئینشكێ بوویه جهێ سه‌رنجراكێشانا گه‌شتیاران ل سه‌رانسه‌رى عێراقێ،دیسا جۆرێن خوارنێ و ڤه‌خوارنێ ژى ل ده‌ف مه ب بوهایه‌كێ گونجاى دهێنه فرۆتن.