ئه‌ڤ ساله 100% په‌رتووكێن نوو دێ ل سه‌ر قوتابیان هێنه به‌لاڤكرن.
ئه‌ڤرۆ، نه‌وزاد هلۆری:
ب مه‌ره‌ما خزمه‌تكرنا زێده‌تر یا كه‌رتێ په‌روه‌ردێ و قوتابیان، وه‌زاره‌تا په‌روه‌ردێ یا حوكمه‌تا هه‌رێما كوردستانێ ب رێیا رێڤه‌به‌ریێن په‌روه‌ردان ده‌ست ب دابه‌شكرنا په‌رتووكان كر، به‌رپرسه‌كێ په‌روه‌ردێ ژی دده‌ت دیاركرن كو ئه‌ڤ ساله 100% په‌رتووكێن نوو دێ ل سه‌ر قوتابیان هێنه دابه‌شكرن.
ئه‌حمه‌د زوبێر، به‌رپرسێ راگه‌هاندنا رێڤه‌به‌ریا گشتی یا په‌روه‌ردا پارێزگه‌ها دهۆكێ بۆ ئه‌ڤرۆ گۆت: (ب مه‌ره‌ما خزمه‌تكرنا كه‌رتێ په‌روه‌ردێ و قوتابیێن خوشتڤی، وه‌زاره‌تا په‌روه‌ردێ یا حوكمه‌تا هه‌رێما كوردستانێ ب رێیا رێڤه‌به‌ریێن په‌روه‌ردێ ده‌ست ب دابه‌شكرنا پرۆسا په‌رتووكان بۆ قوتابیان كریه و د نوكه دا په‌رتووك بۆ هه‌موو كوگه‌هێن رێڤه‌به‌ریێن قه‌زایێن سه‌ر ب پارێزگه‌ها دهۆكێ دهێنه دابه‌شكرن).
زێده‌تر گۆت: (ئه‌ڤ ساله بۆ خواندنا سالا 2021 – 2022 دێ 100% په‌رتووكێن نوو ب هه‌موو جوران ڤه ب چاپه‌كا نوو هێنه دابه‌شكرن، چوو قوتابی په‌رتووكێن كه‌ڤن وه‌رناگرن، ئه‌ڤ یه‌ك دێ هاریكارییه‌كا باش بۆ پێشڤه‌برنا ئاستێ زانستی و قوتابیان كه‌ت، كوما گشتی یا په‌رتووكێن ل سه‌ر قوتابیێن سنورێ پارێزگه‌ها دهۆكێ هێنه دابه‌شكرن دگه‌هنه نێزیكێ شه‌ش ملیون په‌رتووكان).
ناڤبری دیاركر ژی كو پرۆسه‌یا دابه‌شكرنا په‌رتووكان ب رێیا په‌روه‌رده‌یان ل سه‌ر قوتابخانان دێ ل گه‌ل ده‌ستپێكرنا ده‌وامێ بیت و گۆت ژی: (میكانزمه‌كا رێك و پێك ل گه‌ل به‌رچاڤ وه‌رگرتنا ساخله‌میا قوتابیان ژ كۆرۆنایێ به‌رچاڤ هێته وه‌رگرتن).
ل بارا قوتابیێن په‌روه‌ردا شنگالێ، ناڤبری گۆت: (په‌روه‌ردا شنگالێ پشكه‌كه ژ رێڤه‌به‌ریا گشتی یا په‌روه‌ردا پارێزگه‌ها دهۆكێ، نوكه پرانیا قوتابیێن سنورێ په‌روه‌ردا شنگالێ ل كه‌مپان دا دژین، په‌رتووك دێ بێ جوداهی گه‌هنه هه‌موو قوتابێن سنورێ په‌روه‌ردا شنگالێ).
ل سنورێ پارێزگه‌ها دهۆكێ پتری شه‌ش هزار قوتابخانه هه‌نه و نێزیكێ نیڤ ملیون قوتابی تێدا دخوینن.
