ئه‌ڤ ساله 12 پڕۆژێن وه‌به‌رهێنانێ مۆهله‌ت یا وه‌رگرتی
هه‌ولێر، قائید میرۆ:
سه‌رۆكێ ده‌سته‌یا وه‌به‌رهێنانێ ل هه‌رێما كوردستانێ ئاشكرا كر، ئه‌ڤ ساله هه‌تا ده‌ستپێكا هه‌یڤا ئادارێ 12 پڕۆژێن وه‌به‌رهێنانێ مۆهله‌ت وه‌رگرتیه و ئێك ژ وان پڕۆژان ل پارێزگه‌ها دهۆكێ بوویه.
دكتۆر محه‌مه‌د شوكری، سه‌رۆكێ ده‌سته‌یا گشتیا وه‌به‌رهێنانێ ل هه‌رێما كوردستانێ بۆ رۆژناما ئه‌ڤرۆ دیار كر، پلانا ئه‌ڤ ساله یا وه‌به‌رهێنانێ هاتیه راگه‌هاندن و ب سه‌دان پڕۆژه تێدا هه‌نه و گۆت: “وه‌به‌رهێنه‌ر دشێن داخوازیێن خوه بۆ ئه‌نجامدانا ئه‌ڤان پڕۆژان پێشكێشی ده‌سته‌یا وه‌به‌رهێنانێ بكه‌ن و ل گوره‌ی قانوون و رێنمایان دێ مۆهله‌ت بۆ هه‌ر پڕۆژه‌یه‌كێ هێته ده‌ركرن، ئه‌ڤ ساله هه‌تا ده‌ستپێكا هه‌یڤا ئادارێ ده‌سته‌یا وه‌به‌رهێنانێ مۆهله‌ت دایه 12 پڕۆژێن وه‌به‌رهێنانێ”.
دكتۆر محه‌مه‌د شوكری گۆتژی: “ئێك ژ وان پڕۆژان دكه‌ڤیته پارێزگه‌ها دهۆكێ و ب گوژمێ پێنج ملیۆن دۆلاران ل سه‌ر رووبه‌رێ 25 دۆنه‌مێن ئه‌ردی پڕۆژه دێ هێته بجهئینان، پڕۆژێن مۆهله‌ت وه‌رگرتی ئه‌ڤ ساله د بیاڤێن جوداجودا دانه، وه‌كی كه‌رتێن پیشه‌سازی و بازرگانی و ساخله‌می و وه‌رزشی و كار بۆ دانا مۆهله‌تێ بۆ پڕۆژێن دیژی دێ هێته كرن د ئه‌ڤ ساله دا”.
