ئه‌ڤ ساله 24 جاران كاره‌با ده‌ڤه‌را كانی ماسێ كه‌فتیه به‌ر بوردۆمانان
ئامێدیێ، مه‌حمود نهێلی:
رێڤه‌به‌رێ به‌لاڤكرنا كاره‌با ئامێدیێ بۆ رۆژناما ئه‌ڤرۆ دیار كر، بۆ جارا 24یه كاره‌با گوندێن ده‌ڤه‌را كانی ماسێ ژ ئه‌گه‌رێ بوردۆمانێ و شه‌ڕێ د ناڤبه‌را په‌كه‌كێ و سۆپایێ توركیا دا ژ كار دكه‌ڤیت و دبێژیت: زێده‌باری ئاسته‌نگی و نه‌خوه‌شیا كاری و خرابیا رێكێ كو چه‌ندین گولله توپ د رێكێ دا هه‌نه و نه‌په‌قینه و خرابیا بارێ ئێمناهیێ، لێ تیمێن مه د زووترین ده‌م دا شیاینه ڤان هه‌موو ئاریشێن ژ كاركه‌فتنا كاره‌با وان گه‌ندان چاره‌سه‌ر بكه‌ن و كاره‌بێ بۆ ده‌ڤه‌رێ ڤه‌گه‌ڕینن.
ئه‌ندزیار ئارام جه‌لال، رێڤه‌به‌رێ به‌لاڤكرنا كاره‌با ئامێدیێ خویا ژی كر كو دووماهی جار به‌ری دو رۆژان ئه‌و ده‌ڤه‌ره ژ لایێ سۆپایێ توركیا ڤه هاته توپبارانكرن و هێلا 11 كه‌یڤی یا چار گوندان هاته بڕین و گۆت: “ئه‌و ئاریشا ژ كاركه‌فتنا هێلا كاره‌بێ یا گوندێن (ئه‌دنێ و دشێشێ و سه‌ره‌رۆ و ئۆره) پشتی ژ ئه‌نجامێ بوردۆمانا ده‌ڤه‌رێ ژلایێ سۆپایێ توركیا ڤه ژ كاركه‌فتی ژلایێ تیمێن سه‌خبێریا كاره‌با كانی ماسێ ڤه هاته چاره‌سه‌ركرن”.
ناڤهاتی گۆتژی: “كاره‌با گوندێ دشێشێ كو گوهۆڕكێ گوندی به‌ر توپبارانێ كه‌فتبوو و ژ كار كه‌فتبوو، له‌و گوند بوو بێ كاره‌ب، هه‌ر چه‌نده هه‌تا نوكه نه‌هاتیه چێكرن، لێ د ده‌مه‌كێ نێزیك دا ئه‌و ژی دێ چاره‌سه‌ر بیت”.
