ئه‌ڤ ساله 37 پرۆژه ل دهۆكێ هاتینه ب جهئینان
ئه‌ڤرۆ، نه‌وزاد هلۆری
سه‌رۆكاتیا باژێرڤانیا دهۆكێ د كۆنگره‌كێ رۆژنامه‌ڤانی دا ئامارا كار و چالاكیێن خوه یێن شه‌ش هه‌یڤێن بۆری یێن ده‌ستپێكا ئه‌ڤ ساله راگه‌هاندن و دیار كر، ب گوره‌ی ئامارا وان ئه‌ڤ ساله ب گوژمێ پتری 68 ملیار دیناران 37 پرۆژێن جودا ل دهۆكێ هاتینه ب جهئینان و هنده‌ك ژی كاركرن تێدا یێ به‌رده‌وامه.
ئیسماعیل مسته‌فا، به‌رپرسێ راگه‌هاندنا سه‌رۆكاتیا باژێرڤانیا دهۆكێ د كۆنگره‌كێ رۆژنامه‌ڤانی دا گۆت: “ل رێكه‌فتی 1/1/2020 هه‌تا 30/6/2020ێ، ئانكو د ده‌ما شه‌ش هه‌یڤێن بۆری دا 37 پرۆژێن جودا ب گوژمێ 68 ملیار و 856 ملیۆن و 832 هزار دیناران هاتینه ئه‌نجامدان، هنده‌ك ژ وان ب دووماهی هاتینه و هنده‌ك ژی كاركرن تێدا یێ به‌رده‌وامه”.
زێده‌تر گۆت: “762 در و 24 هزار و 406 تراشوك و گولێن هه‌رده‌م، ل گه‌ل 155 هزار گولێن وه‌ختی ل سه‌نته‌رێ باژێرێ دهۆكێ هاتینه چاندن، دیسا 537 موله‌ت ب چێكرنا خانی و جهێن بارزگانی هاتینه‌دان كو ئه‌و ژی 257 موله‌تێن ئاكنجیبوونێ، 55 موله‌تێن بازرگانی، موله‌تێن خزمه‌تگوزاری ژی شه‌ش بوون، 56 موله‌ت ژی تایبه‌ت بوون ب پیشه‌سازی ڤه، هه‌ردیسا 50 ژوور كو ب زێده‌گاڤی هاتبوونه چێكرن هاتینه خراپكرن ل گه‌ل راكرنا 38 كه‌پر و 109 په‌رجانان، ده‌سته‌سه‌ركرنا ترۆمبێلان 95 و خراپكرنا بیستانان 95 ل گه‌ل خراپكرنا 37 باخچه‌یانگ.
ناڤبری دیار كر ژی كو د شه‌ش هه‌یڤێن بۆری دا 84 هزار و 240 ته‌نێن به‌رمایكان هاتینه كومكرن و ره‌وانه‌كرن بۆ كارگه‌ها كواشێ و گۆت: “240 هه‌وێن پاقژكرنا جهێن گشتی ل ناڤخوه و ده‌رڤه‌ی باژێرێ دهۆكێ هاتینه ئه‌نجامدان، ئه‌ڤه زێده‌باری راكرنا 480 ته‌نێن به‌رمایكێن سه‌یرانیان، دیسا چه‌ندین هه‌وێن تایبه‌ت ل ده‌مێ له‌هی و بارانان هاتینه ئه‌نجامدان، دیسا چار هزار و 130 ته‌نێن باوه‌نده‌ری هاتینه به‌رهه‌مئینان، چالاكیێن گورستانا شاخكێ ژی ڤه‌شارتنا 235 زه‌لام و 293 ژنان بوویه”.
