ئه‌ڤ شه‌ڤه دووماھی دەلیڤا دھۆکێ یە
ئەڤرۆ نیوز:
ژچارچووڤێ یاریێن گەرا پێنجێ ژ قوناغا دووماھیا خولا نایابا عیراقێ تیما تەپا پێی یا دھۆک دێ ھەولدەت برینێن خوە ساخ کەت دەمێ ئەڤرۆ ھەڤرکا خوە تیما تەپا پێی یا نەفت جنوب ل دەمژمێر ١٠ شەڤ ل یاریگەھا دھۆک یا سەرەکی مێڤان دکەت د یاریەکا مان و نەمانێ دا بو یانا دھۆک.
ئەڤ یاریە بو یانا دھۆک گرنگیەکا مەزن ھەیو بو وێ چەندێ ھەلویستێ خوە باش بکەت د کوما خوە دا کو نوکە ب ٢ خالان ل رێزا دووماھیێ دھێت لێ ھەتا نووکە ھیڤیێن دەربازبوونێ ھەنە و پێدڤی دو سەرکەفتنایە د ھەر دو یاریێن خوە یێن مایی دا لەورا بو ڤێ یاریێ ھەکە دھۆکێ چاڤ ل دەربازبوونێ یان گەشکرنا ھیڤیا و تومارکرنا سەرکەفتنێ بیت پێدڤیە ب نەخشەکێ ھێرشبەری یاریێ بکەت نەکو وەک یاریێن بوری.ھەروەسا بو ڤێ یاریێ دھۆک دێ پشت بەستێ کەتە سەر ئامادەبوونا بھێزا جەماوەرێ خوە و ھەروەسا دووماھیک دەلیڤەیە د دەستێ راھێنەرێ دھۆکێ دا بو وێ چەندێ بشێت ھەر چ نەبیت سەرکەفتنەکێ د کوما خوە دا توماربکەت لەورا گرنگە گیان و رەوشەنبیریا سەرکەفتنا لنک یاریکەران پەیداکەت و نەبو وەکھەڤی یان خوسارەتیێ بچنە د یاریێ دا.
لدور ڤێ یاریێ ستێرا یانا دھۆک ئاماد ئیسماعیل بۆ رۆژناما ئەڤرۆ گوت:پێدڤیە بو ڤێ یاریێ مفایی ژ خەلەتیێن خوە یێن بوری وەرگرین و زور ب ھشیاری سەرەدەریێ ل گەل کاودانێن یاریێ بکەین و مە چو رێک نینن ژبلی سەرکەفتنێ لەورا پێدڤیە ھەر ھێزەکا مە ھەبیت دڤێ یاریێ دا ب مەزێخین بو تومارکرنا سەرکەفتنێ.
زێدەتر ئامادی دیارکر کو تیما وان یا ئامادەیە و ھەمی یاریکگەر د بەرھەڤن بو ڤێ یاریا گرنگ و داخواز ژ جەماوەرێ یانێ کر ب رێژەکا مەزن ئامادەبن بو پشتەڤانیکرنێو دیارکر دێ یاریێ کەن بتنێ بو سەرکەفتنێ و سێ خالان سەرەرایی وێ چەندێ کو ھەڤرکا وان ژ تیمێن ب رێک و پێکە د کومێ دا.
ژلایێ بەرامبەر رھاێنەرێ نەفت جنوب عیماد عودە گوت: یاریەکا گەلەک ب زەحمەتە بومە چنکو تیما دھۆک ھەتا رادەکی ھیڤیێن خوە ژ دەست داینە لەورا دێ بێ گڤاشتن ھێتە دڤێ یاریێ دا لێ مەژی بەرھەڤی کرینە بو سەرکەفتنێ.
زێدەتر ناڤبری دیارکر کو تیما وان زێدەتر ھیڤی ھەنە و دێ ل گەل یانا دھۆک یاریێ بو سەرکەفتنێ کەن و بەرامبەر دێ چاڤێ وان ل یاریا جەویە و مینا بیت بو ھنگافتنا ھەر تیمەک ژ وان بو وێ چەندێ ب سەرکەڤن.
ژلایەکێ دووڤە ل یاریگەھا شەعب ل باژێرێ بەغدا د گوپیتکا یاریێن ڤێ گەرێ دا جەویە دێ مێڤانداریا مینا کەت د یاریا ڤەکرنا گرێ یا شریکاتیا سەرێ لیستا ڤێ کومێ دا کو نوکە ھەر دو تیم ب شەش خالان لسەرێ لیستا ڤێ کومێ دھێن و ئەڤ یاریە دێ یا ڤەبر بیت بو ھەر دو تیما ، مینا بو ڤێ یاریێ دێ پشت بەسستنێ ل سەر شارەزایی یا راھێنەرێ خوە یێ سوری حوسام سەید کەت کو بەری نوکە راھێنەرێ یانا جەویە بوو لەورا زانیاریێن باش لسەر وێ تیمێ ھەنە و بەرامبەر یانا جەویە دێ پشت بەستنێ کەتە سەر جەماوەرێ خوە ھەروەسان لسەر ھێزا ھێلا خوە یا ھێرشبەریێ و دێ بزاڤێن مەزن کەت بشێت لاوازیا ھێلا بەرەڤانیا مینا بخوە ب دەلیڤە بزانیت و بسەرکەڤیت.
دھێتە زانین دڤێ کومێ دا ھەتا نوکە ھەمی تیم ب ھیڤی نە دەربازبنە یاریا دووماھیێ و چوارگوشا زێرێن چونکو جەویە و مینا ب شەش خالان ل رێزا ئێکێ و دویێ دھێن و نەفت جنوب ب پێنچ خالان ل رێزا سیێ دھێت و دھۆک ب دو خالان ل رێزا دووماھیێ دھێت.