ئه‌ڤ كه‌سه نابيت چو جاران جه‌رجيرێ بخۆن
ئه‌ڤرۆ نيوز:
ڤەخوارنا خوشاڤا جەرجیری یان خوارنا بەلگێن وی ب خاڤی دبیتە ئەگەر مرۆڤ ژلایێ سێکسی ڤە ب ھێز بکەڤیت، رەنگە نھێنیا ڤێ چەندێ ژی ئەو بیت کو ڤیتامین (E) ئەوێ شەھوەتا سێکسی ب ھێز دکەت دناڤ جەرجیری دا ھەیە. و ب رەنگەکێ گشتی جەرجیر یێ پێکھاتیە ژ ھندەک کەرستەیان ژ وان ژی:
Etrozide کو پێکھێنەرەکێ کپریتی یە و کەرستەیەکێ وەکو خەردەلی یە ژ لایێ پێکھات و کاریگەریا خوڤە. و چەندەک ژ ڤیتامینێن (A , E , C) و خوێیێن کانزایی وەکو ( یود، کبریت، ئاسن) و کەرستێ کلوروفیل و خوارنێن زەیتێن رووەکی و رووشال و مفا و ب کارئینەرێن پزیشکی یێن جەرجیری ئەوە کو ب سانەھی ھەرس دبیت، چالاککەرە بۆ لەشی و دەرھاڤێتنا زەراڤێ ب سانەھی دکەت و ھاریکارە بو وەرارا پرچێ و پێدانا رەنگدانا رەش بۆ پرچێ و ھاریکارە بۆ چارەکرنا سوتنێن پیستی و خوینێ پاقژ دکەت و ناھێلیت لەش تووشی کێمیا ڤیتامین سی ببیت، ل گەل چارەسەریا ھندەک نەخوشیێن پیستی و کونترولکرنا ئێشانێن روماتیزمێ، ھەروەسان بلغەمی دگەوری و سینگی دا ناھێلیت و زووکا دەستئاڤا مرۆڤی دئینیت و ئەڤەژی بۆ بەرک و رەملا گولچیسکان باشە.
دیسان ب خوارنا جەرجیری عادەیا ھەیڤانە یا ژنێ پتر دھێتە رێکخستن و شیانێن زەلامی یێن سێکسی ب ھێز دئێخیت.
جەرجیر د نوشداریا کەڤن دا ژی ھاتیە ب کارئینان و ل دووڤ پزیشکیا کەڤن دیاردبیت کو ڤەخوارنا خوشاڤا وێ و خوارنا بنکێن وێ و بەلگێن وێ بۆ بھێزکرنا سێکسی ب مفانە و ھندەک ژێدەر ژی نیشانێ ب وێ چەندێ ددەن کو جەرجیر وەکو چارەسەری بو نەھێلانا کرمیبوونا ددانان ھاتیە ب کارئینان و دیسان ھاتیە ب کارئینان کو دەستنڤێژا ستوور زوو بھێت.
خوارنا جەرجیری ھەر ژ کەڤندا بۆ پاقژکرنا خوینێ و ب لەزکرنا خولا خوینێ ھاتیە ب کارئینان و رەھێن وی و ئاڤا وی ھاتیە ب کارئینان بۆ نەھێلانا نەمەش و پنیێن سەر دێمی و بۆ نەھێلانا خوین بەربوونێ د پێدیێن ددانان دا و ب ھێزکرنا ددانان و وەکو دەرمانەکێ ئێشکێمکرنێ بۆ نەخوشیێن روماتیزمێ و گەھان و بۆ پاقژکرنا رووڤیکا و مەعیدەی و کێمکرنا رێژا شەکرێ دناڤ دەستئاڤێ دا.
بەلێ ل گەل ڤێ چەندێ پێدڤیە د ھندەک دەمان دا خوارنا جەرجیری بھێتە کونترولکرن و ژوان دەمان ژی: باشترە ژنێن دوگیان کێم ب کاربینن، ئەوێن تووشی مەزنبوونا پەریزادێ دبن نابیت ب چ شێوەیەکی جەرجیری ب کاربینن و ھەر کەسەک پێدڤیە ب رێژەیێن دەستنیشانکری جەرجیری بخوت و پێدڤیە بزانن کو گەلەک ب کارئینانا وی دبیتە ئەگەرێ سوتنا میزدانکێ.
