ئه‌ڤ مه‌سيننێ كوردى يێ به‌رى 250 سالايه
ئه‌ڤرۆ نيوز:
عادل تیلەری، بەرنیاس ب عادل کەلەپۆر کو ئەڤە چەندین سالە کەلۆپەلێن کەلەپۆرێ کوردی دپارێزیت و نوکە مۆزەخانەیەک ھەیە ب ناڤێ (مالا کوردا، مۆزەخانا عادل بەرواری) ل دۆر وان کەلۆپەلێن وی دناڤ وێ مۆزەخانێ دا پاراستین بۆ رۆژناما ئەڤرۆ دبێژیت: ھەتا نوکە ئەز شیایمە پتری هزار و 100 پارچێن جۆدا یێن تەڤایا کەلۆپەلێن کەلەپۆری یێن کوردی کۆمڤە بکەم و ب پارێزم، و ئەز شیایمە گەلەک تشتێن نوو ب دەست خوە بێخم و بۆ جارا ئێکێ نیشا خەلکی بدەم، وەک مەسینێ کوردی کو بۆ جارا ئێکێ ئەڤ مەسینە ل دەڤەرا بەرواری بالا ل گوندێ موسا بەگێ ھاتیە دیتن، کو دیرۆکا وی ڤەدگەریت بۆ بەری 250 سالان و مەسینەکێ جیاوازە و ھەتا نوکە ئەڤ جورێ مەسینێ ل دەڤەرا دھۆکێ نەھاتیە دیتن و ب ئاخێ ھاتیە چێکرن و دیارکر ژی: ژ ئەگەرێ خەمخۆری و ماندیبوون و وەستیانێ و بەرژەوەندا مللەتێ خوە ئەز شیام ڤان جۆرێن کەلۆپەلێن کەلەپۆری کۆمڤە بکەم و ژ نەمانێ قورتال بکەم، و گەلەک پارچە ژ وان من یێ ژبن ئاخێ ئیناینەدەر و ھەکە ئەز لێ نە ببامە خۆدان دا بەرزەبن و ژناڤ چن، پرانیا وان تشتێن من ھەین یێن دەڤەرا ئامێدیێ نە، ھەروەسا یێن دەڤەرێن جۆدا یێن پارێزگەھا دھۆکێ نە.
