ئهگهرێ لاوازیا ئهنجامێن دهۆكێ چ بوو؟!
سالار دۆسكى
پشتى دهركهفتنا ئهنجامێن پۆلا 12 و نههێ نشتیمانى ل سهرانسهرى كوردستانێ، رێژا دهرچووێن ئێكێ هاتیه دیاركرن كو سهرجهمێ 57 قوتابیێن ئێكێ ب تنێ قوتابیهكا دهۆكێ رێزا ئێكێ هاتى، گهلهك دل نهرهحهتى ل دهڤ خهلكێ دهۆكێ و كهرتێ پهروهردێ پهیدا بوون و ههر ب لهز كۆمبوون ل سهر ئاستێ بالا ل پارێزگههێ و پهروهردا هاتنهكرن و دوڤچوون ل سهر خالا لاواز هاتهكرن كو بوویه ئهگهرێ هاتنا ئهڤان ئهنجامان هاتهكرن، گهلهك خال هاتنه دیاركرن كو ئهگهرن ئهنجام دلاواز بووینه كو قوتابخانێن سێ دهوامى ههنه، ئاڤاهى كێمن قوتابى گهلهك د پۆلهكێ دانه، مامۆستایێن بسپۆر دكێمن و مامۆستایێن نه بسپۆر وانا بێژن، دیسا گوهۆرینا سیتهمێ پرسیاران كو بووینه ههلبژارتن و شێوازێ زاراڤى كو ب كرمانجى و سۆرانى بوویه، راسته ئهڤه ههموو ئهگهرن و كێماسى نه و دبیت گهلهك ئهگهرێن دى ژى ههبن، لێ پرسیار ئهوه ما ههر پتریا ئهڤان ئهگهران نینه ل پارێزگههێن دى ژى، ما ههر ههموو سهر ب ئێك وهزارهت و حوكمهت ڤه نین؟، دهمهكى مه دگۆت ئهو كاغهزێن تاقیكرنا سهڵح دكهن و ئهو كرمانجى تێناگههن، بهلێ نوكه ئامیره ههموویان تهسڵیح دكهت و ئهو سۆرانى و بههدینى نهنیاست، ههكه بێژین ئاڤاهى كێمن، چار ساله قهیران حوكمهتێ چو ئاڤاهى چ جهان بۆ قوتابحانا دروست نهكرینه و ههموو ب ئێك چاڤ هاتینه دیتن، ههكه بێژین مامۆستایێن بسپۆر كێمن، ماوێ پتر ژ چار سالانه چ دامهزراندن ل كوردستانێ ههموویێ نهبوویه، ئانكو ب گشتى ئهگهرێن هاتینه دیاركرن دبیت سهرانسهرى بن و گشتى بن و دبیت قوتابیێ مه هندهك ئهگهرێن دى ههبن و دڤێت شارهزایێن پهروهردێ دووڤچوونێ ل سهر بكهن و ڤهكۆلین ل سهر بهێنهكرن، خالا من دڤێت ل سهر براوستم و پشتى دهركهفتنا داتایێن ئهنجاما دیاربوو كو كهسێن ب قوپیایێ هاتینهگرتن رێژهكا مهزن خهلكێ دهۆكێ بووینه كو 57 قوتابى ل ههر دو پشكێن زانستى و وێژهیى و ههر دو پهروهردێن گهرمیان و حهلهبجه ههر چ قوتابی ل ههدو پشكان نههاتینهگرتن و ههر نهبووینه، پرسیار ئهوه بۆچى بۆ دهرچوونێ و دهركهفتنا ئهنجامان دهۆك نێزیكى ئهڤان ههر دو جهان دهێته ههژمارتن كو ههلهبجه و ئیدارا گهرمیان و ههر ناگههیته ئاستێ ههر دو پارێزگههێن دى نه و بۆچى بۆ قوپیاكرنێ دهۆك ل سهرنسهرى كوردستانێ پلێن ههره بلند تۆماركرن؟، ب دیتنا من خواندنا من بۆ بابهتى ئهگهر ههنه دبیت ههژمارهكا مامۆستان بیت، چونكو ب گشتى رێژا دهرچوونێ دهۆك یا باشه ب تنێ مه سهركهفتیێن ئێكێ نین، بهلكو دووڤچوونێن من دا بۆ پهروهردێ قوتابى سهر نۆتێ ههتا دگههیته نۆت و ههشتێ گهلهك ههنه و ههر دو قووناغێن 12 و نههێ، لێ دروستكرنا ژینگهها تاقیكرنێ كو قوتابى ماوێ سێ دهمژمێران و هندهك تاقیكرنان پتر ژى نهیا دروسته، گهلهك رێڤهبهرێن هۆلا سهردهریكرنا وان ل گهل قوتابیان وهك ئهفسهرێن لهشكرى یه و دێ دهنگێ خوه قوتابیهكى بلند كهت دێ سهقایێ هولێ ههموو هێته تێكدان و هزر ناكهت ئهڤه دێ كارتێكرنێ ل دهروونێ ههموو قوتابیان كهت و ئهو تشتێ خواندى دێ ژ بیرێ چیت، دیسا ئامارێن قوپیایێ وێ چهندێ ژى دیار دكهن، كو ئهنجامێن ئێكێ ل پارێزگههێن دى جهێ گومانێ بن، دڤێت دووڤچوون ل سهر ئهنجامێن ئهوان قوتابیان بهێتهكرن ل ههموو قووناغێن خواندنێ و ههتا گههشتیه وى ئاستى و پتر روون بیت كو ئهڤه نه بهرههمێ بلوتوسى یه، بهرامبهر ژى دڤێت رێڤهبهرێن هولا و مامۆستایێن سهرپهرشتى ئهزموونا ژى هۆسا بهر قوتابیێ مهنه راوستیایبن كو نهشێت بزاڤهكێ بكهت، نابێژم پێلن قوپیایێ بكهت، لێ ههكه لڤینهك كر ههر ئێكسهر نههێته دهركرن و ب قۆپیا بهێته ههژمارتن، پێدڤى یه ب چاڤهكێ پهروهردهیى سهردهرى ل گهل بهێتهكرن وهك بابهك ل گهل زارۆیێ خوه بهێته دیتن، دا پتر پرۆسێسا پهروهردێ گهشێ ب خوه ڤهبینت، داخوازا سهركهفتنێ بۆ گشت قوتابیان و مامۆستایێن پهروهردێ خوازم.
