ئه‌گه‌ر هه‌یه خولا پلا نایاب بهێته پاشئێخستن
ئه‌ڤرۆ،
سه‌رۆكێ لژنا به‌ریكانا ل ئێكه‌تیا ته‌پا پێی یا ئیراقێ دیاركر كو دبیت ده‌ستپێكا وه‌رزێ نوو یێ خولا پلا نایاب بهێته پاشئیخستن ئه‌گه‌ر ئێكه‌تیا ئاسیا به‌رسڤا نڤێسارا مه دا و ژڤانێ قاره‌مانیا سۆپه‌ر د ده‌مێ خوه دایه.
زێده‌تر د كۆنگره‌یه‌كێ رۆژنامه‌ڤانی دا حه‌یده‌ر عه‌وفی بۆ ده‌زگه‌هێن راگه‌هاندنا ئیراقێ گۆت: هه‌رچه‌نده هه‌تا نوكه ژی ژڤانێ خولا پلا نایاب یێ په‌سه‌ندكریه ل 20ێ ڤێ هه‌یڤێ لێ لژنا رێپێدانێ ل ئێكه‌تیا ته‌پا پێی نڤێساره‌كا فه‌رمی دایه ئێكه‌تیا ئاسیا ژبۆ درێژكرنا ماوه‌یێ ده‌ستنیشانكری بۆ یانێن ئاریشا دارایی ل گه‌ل یاریزان و راهێنه‌ران هه‌یی كو ژ ده‌لیڤا دو هه‌یڤا بوریت، لێ هه‌تا نوكه چو به‌رسڤ نه هاتیه و چاڤه‌ڕێنه هه‌تا دووماهیا ڤێ حه‌فتیێ هه‌كه به‌رسڤ هات دێ بۆ ده‌مه‌كێ ده‌ستنیشانكری ده‌ستپێكا خولێ هێته پاشئێخستن پێخه‌مه‌ت یانێن لبن گه‌ڤێن راوه‌ستاندنێ بشێن ئاریشێن خوه یێن دارایی ل گه‌ل یاریزانا چاره‌سه‌ربكه‌ن، به‌روڤاژی هه‌كه نه هات خول بشێوه‌كێ سرۆشتی برێڤه‌چیت ل گه‌ل جهئینانا رێنومایێن لژنا به‌ریكانا و كاسا سوپه‌ر دناڤبه‌را جه‌ویه و زه‌ورا ل 17ێ ڤێ هه‌یڤێ هێته كرن.
بۆ زانین 14 یانه د خولا پلا نایابا ئیراقێ دا رێپێدانا پشكداریێ د خولێ دا بوو نه‌هاتیه كرن ژلایێ ئێكه‌تیا ئاسیا یا ته‌پاپێی ژبه‌ر نه چاره‌سه‌ركرنا قه‌رێن یاریزانا و راهێنه‌ران و بابه‌تێ یاریگه‌هان.
