ئه‌گه‌ر …
“هه‌رده‌ما عه‌قل ڕاوه‌ستا، له‌هیا ئه‌گه‌را هه‌ستا”
ئه‌ڤ ئه‌گه‌رێن ئه‌ز دێ به‌حس كه‌م، نه ب مانا: سه‌ده‌من به‌لكو ب مانایه‌كا دى و بلا رامانا وێ راڤه‌كرنا ته بیت!!
ئه‌گه‌ر دونالد ترامپ نه سه‌رۆكێ ئه‌مریكا با، دا گۆڤه‌ندا كێ هه‌ر یا گه‌رم بیت؟
ئه‌گه‌ر كۆریا باكۆر چه‌كێ ئه‌تۆمى نه‌با دا هۆسا یا گه‌رم بیت؟
ئه‌گه‌ر مارى لۆپێن بوو سه‌رۆككۆمارا فه‌ره‌نسا، دێ سعوودیا و قه‌ته‌ر چ كه‌ن؟
ئه‌گه‌ر نه‌ته‌نیاهۆ یێ ب تۆره با و ئه‌ته‌كێتێن دیبلۆماسیێ زانیبا، دا پشتا خوه ده‌ت وه‌زیرێ ده‌رڤه یێ ئه‌لمانیا؟
ئه‌گه‌ر قیبله و گۆرێ پێغه‌مبه‌رى و په‌ترۆل ل سعوودیێ نه‌بان؟
ئه‌گه‌ر ل رۆسیا پۆتین سه‌رۆك نه‌با؟
ئه‌گه‌ر ل سینێ پارتا كۆمونیست ل سه‌ر ده‌ستهه‌ڵاتێ نه‌با؟
ئه‌گه‌ر كوردستان ل رۆژهه‌ڵاتا ناڤین نه‌با؟
ئه‌گه‌ر پارتێن كوردى باوه‌رى ب دیمۆكراتیێ هه‌با؟
ئه‌گه‌ر ل كوردستانێ رووبار و كانزا و په‌ترۆل نه‌بان؟
ئه‌گه‌ر ل كوردستانێ (مه‌ره‌م هه‌رێما كوردستانێ یه) هنده به‌حسێ سازانێ نه‌هاتبا كرن؟
ئه‌گه‌ر ل كوردستانێ د ساڵێن 1980 دا، كۆنگرێ نه‌ته‌وى هاتبا گرێدان دا ره‌وشا په‌یوه‌ندیێن پارتێن كوردستانێ یا هۆسا بیت؟
ئه‌گه‌ر بۆ شه‌رێ براكوژیێ سه‌ده‌م نه‌هاتبان دیتن؟
ئه‌گه‌ر ئه‌م نه‌ته‌وه بین، دێ په‌یوه‌ندیان ل گه‌ل داگیركه‌رێن كوردستانێ ئاڤاكه‌ین و رێزێ لێگرین؟
ئه‌گه‌ر به‌رژه‌وه‌ندێن نه‌ته‌ویى و پارستنا وان به‌رژه‌وه‌ندیان خالا سه‌ره‌كى یا هه‌ر پارت و گرۆپه‌كا سیاسى بیت، دێ پێدڤى كه‌ت هنده كۆمبوونێن خرش بهێنه گرێدان؟
ئه‌گه‌ر یاسا سه‌روه‌ر بیت، پێدڤى دكه‌ت داخوازا سه‌روه‌ربوونا یاسایێ بكه‌ین؟
ئه‌گه‌ر حوكمه‌تا مه گه‌نده‌ل بیت (ببوورن ئه‌ڤه گۆتنا رایه‌دارێن مه بخوه‌یه، من وه نه‌گۆتیه)، دێ چاوا چاكسازى هێنه كرن؟ دێ ڤێ ژى ل سه‌ر زێده‌كه‌م: “دز و مالخوێ مالێ بوونه شریك، گا دكێرێ ڕا دزى؟”
ئه‌گه‌ر رۆژنامه‌ڤانى و هزر ئازاد بیت، بۆچى فه‌رهادێن وه‌ڵاتێ من ل رۆژا نیڤرۆ دهێنه ئێشاندن؟
ئه‌گه‌ر شكه‌ستن د كارى و برێڤه‌برنا وه‌ڵاتى دا ده‌ستبه‌ردان ل په‌ى بهێت (ئه‌ڤه وه‌ك نیڤ یاسایه‌كێ یه ل جیهانێ)، ئه‌گه‌ر ل كوردستانێ ژى بهێته په‌یڕه‌و كرن، دێ چه‌ند سه‌ركرده و سیاسى یێن مه ل جهێن خوه مینن؟
ئه‌گه‌ر مه ئۆپۆزسیۆنه‌كا كارا هه‌با، دا بارانا بۆتڵا و په‌یڤێن بێ تۆره‌ییێ د په‌رله‌مانى دا بارن و پاشى ئیفلیج بیت؟
ئه‌گه‌ر “دوژمن بوونه دۆست، دونیا (دێ) مینیت بهۆست”؟
ئه‌گه‌ر و ئه‌گه‌ر و ئه‌گه‌ر … به‌رسڤ ل با وه … ئه‌ى مرۆڤێن خوه‌ش باوه‌ر.
ل داویێ، یا هاتیه گۆتن: “مرۆڤ ب پسیارا دچیته حه‌جێ”. ئه‌ڤه من رێیا حه‌جێ گرت.
