ئه‌ی فریشته
رێژین حكمه‌ت
بهێله د به‌رێخوه‌دانا چاڤێن ته‌دا ببمه دینه‌ك
هه‌می كولانێن ته‌نگ و تاری یێن ڤی باژێری
ب وێ به‌رێخوه‌دانێ تێكڤه‌ده‌م!
بهێله وه‌رگرم ئیلهامه‌كێ ژ جوانیا دێمێ ته!
ئه‌و ئیلهام من د خه‌یالان دا خاڤ بكه‌ت!
بهێله ده‌ستێن ته دناڤ شعرێن خوه دا بگێریم
ڤالاهییا دناڤ تبلێن خوه دا ب گڤاشتنا ده‌ستێ ته تژی بكه‌م!
چونكی ئێك ژ وان ئه‌و شعره، یا نیڤه شه‌ڤان دنڤیسم،
یێ دی ئه‌و ئاوازه یا ل به‌ر سه‌مایێ دكه‌م!
دیتنا ته بۆ چاڤێن من داخوازینه
ده‌مێ خه‌م و نه‌خوه‌شیان
تو ئه‌و به‌نده‌ر بی یێ ئه‌ز په‌نایێ بۆ ببه‌م!
ئه‌و هه‌ناسه‌ی یا ب شه‌ڤ و ڕۆژان دهه‌لكێشم!
ئه‌و هه‌مبێزه‌ی یا چ جار ژێ تێرنه‌بم!
ئه‌ی ئه‌و ڕه‌گه‌زی ئه‌ز دبێژمێ فریشته…
د ڤێ شعرێ دا
گڕنژینا من په‌یوه‌ندی ل گه‌ل ژیانا ته گرێدا
من كره شۆره‌شه‌ك
ل هه‌می قولاچكێن سارێن ڤێ دنیایێ
ئه‌و گڕنژین ته گه‌رم بكه‌ت!
حه‌سیدیا ته بۆ بایێ بهاران بشكێنیت
چونكی، هه‌رده‌م ته دگوت:
ئه‌و بایه بێهنا داڤێن پرچا ته دكه‌ت.!
ل ڤی باژێرێ بێزار بێ ده‌نگییه‌كا سه‌یر داگیركره!
هزرێن ته ته‌وافا خه‌یالێن من یێن ڕاستی دكه‌ن!
هنده‌ك كه‌س یێن ب ڕێ ڤه
هنده‌ك ژی پێنگاڤێن مرنێ دهاڤێژن!
د هه‌ر تاری بوونه‌كێ دا
من خوه بۆ ته دكره ڕۆناهی
د ئه‌سمانێ ته‌دا دگرنژیم!
وه‌ك هه‌یڤه‌ك بێ دوماهی…
چاڤێن من باران و بارۆڤێن خه‌ریبیێ ل دنیایێ باراندن
چیرۆكا ته
بۆ من كرنه هه‌بوون و نه‌بوون
هندی من دیتی ئه‌ز یا هه‌یم
تو نه‌بووی!
چه‌ند ڕوح د جه‌سته‌یێ دا من دا بیت
دێ هه‌ر حه‌ز ژ ته‌كم
ئه‌گه‌ر فریشته‌یێ ڕوح كێشانا من ژی تو بی.!
