ئيران پشته‌ڤانيا پرۆژێ راستڤه‌كرنا قانوونا سه‌رۆكاتيا هه‌رێمێ دكه‌ت
ئه‌ڤرۆ نيوز، نيوار محه‌مه‌د سه‌ليم:
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند كو شه‌رمزاريه ل ده‌مه‌كێ هوسان قونسلێ ئيرانێ ل په‌رله‌مانێ كوردستانێ ئاماده بيت و بێى وى چو كاران نه‌كه‌ن.
ئه‌ڤرۆ په‌رله‌مانێ كوردستانێ ب ئاماده‌بوونا 57 ئه‌ندامێن په‌رله‌مانى و بێ ئاماده‌بوونا په‌رله‌مانتارێن پارتى ديموكراتى كوردستان و مه‌سيحى و توركمانى، په‌رله‌مانێ كوردستانێ خواندنا ئێكێ بۆ پرۆژێ قانوونا راستڤه‌كرنا قانوونا سه‌رۆكاتيا هه‌رێما كوردستانێ كر.
د ڤێ روونشتنا په‌رله‌مانى دا، ل سه‌ر داخوازا هنده‌ك فراكسيۆنا قونسلێن چه‌ند وه‌لاتان هاتينه داخوازكرن به‌لێ هه‌تا نڤيسينا ڤى بابه‌تى ب تنێ قونسلێ ئيرانێ پشكدارى ڤێ كۆمبوونا په‌رله‌مانێ كوردستانێ كريه.
ل دۆر ڤێ پرسێ محه‌مه‌د عه‌لى ياسين،ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ، د داخۆيانيه‌كا تايبه‌ت دا بۆ ئه‌ڤرۆ نيوز گۆت: “ئه‌ڤ پرۆژێ نوكه بۆ راستڤه‌كرنا قانوونا سه‌رۆكاتيا هه‌رێمێ هاتيه پێشكێشكرن يێ ده‌وله‌تا ئيرانێ و قونسلێ وێ يه ل كوردستانێ”.
زێده‌تر گۆت: “ب مخابنى ڤه كو كوردستان ل به‌ر ده‌رازينكا سه‌ربه‌خۆبوونێ يه، ئێكه‌تى نشتيمانى كوردستان و بزاڤا گۆڕان كار ژ بۆ سه‌رخستنا ئه‌جنيدايێن وه‌لاتێ ئيرانێ دكه‌ن، شه‌رمه‌كا گه‌له‌ك مه‌زنه ده‌ستێ وان ئيرانێ دابيت”.
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ ئاماژه ب وێ چه‌ندێ ژى كر كو ئه‌ڤا په‌رله‌مانێ كوردستانێ ئه‌ڤرۆ كرى يا دوور بوو ژ ته‌وافقا سياسى و سازانێ و ب قووناغا پشتى ته‌وافقا سياسى د زانين.