ئۆندەر: دڤێت دەولەتا تورکیا خوە ئێکلا بکەت
سڕی سۆرەیا ئۆندەر ئەندامێ شاندێ ئیمرالیێ د داخۆیانیەکێ دا دیار کر، عەبدوللا ئۆجەلان د هەلوەستێ خوە یێ بۆ ئاشتیێ دا رژدە و ب پەیامێن خوە ژی پشتەڤانیێ ل دەستپێکرنا قۆناغەکا نوو ل تورکیا دکەت، لێ مخابن هەتا نها دەولەتا تورکیا خوە ئێکلا نەکریە، ل ئالیەکێ ئەردۆغان و بەرپرسێن ئاکپارتیێ بەحسێ ئاشتیێ دکەن و ل ئالیێ دی ژی گەفان ل گەلێ کورد دکەن، ئەو یەک ژی بێگومان ناهێتە قەبوول کرن و دڤێت دەولەتا تورکیا خوە ئێکلا بکەت.
ناڤهاتی ئەو یەک ژی دیار کر، هەکە دەولەتا تورکیا ب تەمامی بۆ ئاشتیێ بەرهەڤ بیت دێ قۆناغا نها ب باشی برێڤە چیت، لێ جارێ تشتەک وەسا نینە.
ل ئالیێ دی دوهی دەولەت باخچەلی سەرۆک پارتا بزاڤا نەتەوەپەرست یا تورکیا ژی دیار کر، دڤێت د سەرەدانا ڤێجارێ یا شاندێ ئیمرالیێ دا ئۆجەلان بۆ فەرمی هلوەشاندنا پەکەکێ راگەهینیت، ئەو یەک نەهێتە کرن دەولەتا تورکیا ژی نەشێت ب کریاری چو پێنگاڤان بهاڤێژیت.
