ئۆپۆزسیۆنا تورکیا نەشیا ببیتە جهێ باوەریا وەلاتیان
ئەڤرۆ
چاڤدێرێن سیاسی دیار دکەن، شکەستنا ئۆپۆزسیۆنا تورکیا د هەلبژارتنێن پەرلەمانی دا دێ کاریگەریا خوە ل گەڕا دویێ یا هەلبژارتنان دا ژی کەت، هەرچەندە هەتا نها ئەردۆغان و هەڤالێن وی ژی ژ سەرکەفتنا خوە پشتراست نینن لێ هەموو ئاماژە بۆ هندێ دچن، کو د گەڕا دویێ یا هەلبژارتنان دا ئەردۆغان دێ رێژەیا دەنگێن خوە زێدەتر کەت.
بەکر ئاغردیر چاڤدێرێ سیاسی راگەهاند، هەرچەندە شەش پارتیێن ئۆپۆزسیۆنێ پێکڤە هەڤپەیمانیا مللەت ئاڤا کرن، لێ د هەلبژارتنان دا وەکو پێدڤی پشتەڤانی ل کەمال کلچدار ئۆغلۆیی نەکرن و هەروەسا ستراتیژیەکا هەڤپشک یا پارتیێن ئۆپۆزسیۆنێ ژی نەبوو، سەرکردێن پارتیێن ئۆپۆزسیۆنێ د هەوا پرۆپگاندا هەلبژارتنان دا گەلەک شاشی کرن و نەشیان مفای ژ رەوشا هەی وەربگرن، هەروەسا ئۆپۆزسیۆنا تورکیا نەشیا ڤێ باوەریێ بدەتە وەلاتیێن تورکیا کو دشێن باشتر ژ ئەردۆغانی و هەڤپەیمانیا جمهور وەلاتی برێڤە ببەن، ژ بەر هندێ ژی د گەڕا ئێکێ یا هەلبژارتنان دا تووشی شکەستنەکا مەزن بوون و د گەڕا دویێ یا هەلبژارتنێن سەرۆک کۆماریێ دا ژی هەلوەستێ ئۆپۆزسیۆنێ گەلەک لاوازە و وەکو پێدڤی پشتەڤانیێ ل کلچدار ئۆغلۆیی ناکەن و گۆت: (ل گۆر ئەنجامێن گەڕا ئێکێ یا هەلبژارتنێن سەرۆک کۆماریێ دیار دبیت، کو د ناڤ هێزێن ئۆپۆزسیۆنێ دا ئێکدەنگیەکا تەمام نەبوویە، ژ بەر هندێ ژی گەلەک ژ دەنگدەرێن پارتیا مەرال ئاکشەنەرێ دەنگێن خوە نەداینە کلچدار ئۆغلۆیی و ژ بەر هندێ ژی رێژەیا دەنگێن کلچدار ئۆغلۆی ل گۆر یێن ئەردۆغانی گەلەک کێم بوون).
ناڤهاتی ئەو یەک ژی دیار کر، هەرچەندە د گەڕا ئێکێ دا ئەردۆغان شیا رێژەکا باش یا دەنگان بدەستڤە بینیت لێ هێشتا ژی گەڕا دویێ یا مای، نابیت مرۆڤ بێژیت سەرکەفتنا ئەردۆغانی یا مسۆگەرە، ئەردۆغان و هەڤالێن وی ژی نها ب رەنگەکێ باش کار دکەن دا بشێن د گەڕا دویێ دا سەرکەفتنا خوە مسۆگەر بکەن، ژ بەر هندێ ژی مرۆڤ نەشێت بێژیت کو هەلبژارتن ل تورکیا ب دووماهی هاتینە، گەڕا دویێ ژی گەلەک گرنگە و سەرکەفتنا ئەردۆغانی دشێت کاریگەریەکا گەلەک مەزن ل پرۆسیسا سیاسی ل تورکیا بکەت، چونکی ئەردۆغانی د هەوا پرۆپگاندا هەلبژارتنان دا گەلەک سۆز داینە خەلکی، ژ بەر هندێ ژی پێنج سالێن بهێن ل تورکیا دێ گەلەک جوداتر بن ژ پێنج سالێن بۆری.
ل ئالیێ دی عەبدوللا کیران مامۆستایێ زانکۆیا مووشێ ل باکورێ کوردستانێ ژی راگەهاند، ئەو کوردێن دەنگێن خوە داینە پارتیا ئەردۆغانی ژی کەسێن وەلاتپارێزن و وان ژی داخوازیێن خوە هەنە، نابیت بەرپرسێن هەدەپێ وەسا هزر بکەن، کو دڤێت هەموو کورد دەنگێ خوە بدەنە وان، بەری هەر تشتەکێ دڤێت بەرپرسێن نها یێن هەدەپێ پێداچوونێ د سیاسەتا خوە دا بکەن، چونکی وان چو بەرنامەک جودا و تایبەت بۆ کوردان ل تورکیا نەبوو، ل گەلەک باژێرێن کوردان کەسێن چەپ یێن تورک هاتنە بەربژار کرن، ئەو یەک ژی بوو جهێ دلگرانیا دەنگدەرێن کورد، چونکی بەری نها ژی گەلەک جاران هەدەپێ ب دەنگێن کوردان کەسێن چەپێن تورک فرێکرینە پەرلەمانی و وان د دەمێ پەرلەمانتاریا خوە دا چو تشتەک بۆ کوردان نەکرینە، ژ بەر هندێ ژی د ڤان هەلبژارتنان دا دەنگدەرێن کورد نەخواستن جارەکا دی دەنگێ خوە بدەنە کەسێن وەسا.
ناڤهاتی ئەو یەک ژی دیار کر، هەدەپێ چو بەرنامە بۆ کوردان نەبوون، هەموو هێزا خوە بۆ دژبەریا ئەردۆغانی و پشتەڤانیا کلچدار ئۆغلۆیی تەرخان کر، چ تشتەک تایبەت د بەرنامێ هەدەپێ دا بۆ کوردان نەبوو، ژ بەر هندێ ژی هەدەپە ڤێجارێ ل باکورێ کوردستانێ یا سەرکەفتی نەبوو و رێژەکا مەزن ژ دەنگێن خوە ژ دەستدان، دڤێت هەدەپە پێداچوونێ د سیاسەتا خوە دا بکەت، چونکی دەنگدەرێن کورد ئەڤرۆکە پتر ژ هەر دەمەکێ هشیارن و ناخوازان هەدەپە یان ژی هێزەکا دی بازرگانیێ ب دەنگێن وان بکەت.
ل ئالیێ دی گەلەک چاڤدێرێن سیاسی ل تورکیا و باکورێ کوردستانێ ژی دیار دکەن، نها پڕانیا پەرلەمانی کەفتە دەستێ هەڤپەیمانیا جمهور یا ب سەرۆکاتیا ئەردۆغانی، ژ بەر هندێ ژی د گەڕا دویێ یا هەلبژارتنان دا رەجەب تەیب ئەردۆغان دێ شێت رێژەیا دەنگێن خوە زێدەتر ژی لێ بکەت، ژ بەر شکەستنا پارتێن ئۆپۆزسیۆنێ د گەرا ئێکێ یا هەلبژارتنان دا، دێ رێژەیا دەنگێن کلچدار ئۆغلۆیی د گەرا دویێ دا کێمتر ژی لێ هێن، چونکی هەر شەش پارتیێن ئۆپۆزسیۆنێ نەشیان ببنە جهێ باوەریا وەلاتیێن تورکیا و ئەو یەک دێ کاریگەریا خوە ل نێرینا دەنگدەران د گەرا دویێ یا هەلبژارتنان دا کەت.
