ئۆپۆزسیۆنا چەپ یا ئیرانی داخوازا سیستەمەکێ فیدرالی دکەت
ئەڤرۆ نیۆز، ھۆشەنگ:
رۆستەم جیھانگیری ئەندامێ سەرکردایەتیا پارتی دیموکراتی کوردستان/ ئیران بۆ ئەڤرۆ نیۆز دیار کر کو د بەرنامێ پارتیا مە دا سیستەمێ فیدرالی بۆ ئیرانێ ھەیە کو تێدا مافێن گەلێ کورد ژی پاراستی بن و سێ رۆژان بەری نھا ژی ١٠ پارتێن ئۆپۆزسیۆنا ئیرانی کو ٤ ژ وان پارتێن کوردی نە داخۆیانیەکا ھەڤپشک ل دۆر پاشەرۆژا ئیرانێ بەلاڤ کرن و گۆت: (٤ پارتێن کوردی و ٦ پارتێن دی ژی کو نوونەراتیا نەتەوێن دی یێن ئیرانێ دکەن داخواز دکەن کو د سیستەمەکێ فیدرالی دا پرسا کوردی و پرسا نەتەوێن دی ل ئیرانێ بھێتە چارەکرن).
ئەندامێ سەرکردایەتیا پارتی دیموکراتی کوردستان/ ئیران ئەو یەک ژی دیار کر کو بەری نھا رێکخراوا موجاھدێن خەلک ژی پشتەڤانی ل مافێن گەلێ کورد د سیستەمەکێ فیدرالی دا کربوو و ئەم ھێڤیدارین ھەموو ئالیێن دی یێن ئۆپۆزسیۆنێ ژی پشتەڤانیێ ل مافێن رەوا یێن گەلێ کوردستانێ ل ئیرانێ بکەن.
