ئۆکرانیا: نەچارین ستراتیژیا خوە یا شەڕی بگوهۆڕین
فەرماندارەکێ لەشکرێ ئۆکرانیایێ راگەهاند، رۆسیا ب هەموو رەنگەکێ ئێرشی پایتەختێ ئۆکرانیایێ دکەت و د چەند رۆژێن بۆری دا گەلەک وەلاتیێن سڤیل ژی بووینە قوربانی، ئێدی ئەو وەکو ئۆکرانیا نەچارن ستراتیژیا خوە یا شەڕی بگوهۆرن و دێ دەست ب ئێرشێن نوو ل دژی رۆسیایێ کەن.
هەمان فەرمانداری ئەو یەک ژی دیار کریە، کا چاوا رۆسیا ئێرشی باژێرێن ئۆکرانیایێ دکەت وان ژی ئەو شیان هەنە ئێرشی هندەک باژێرێن رۆسیا بکەن، چونکی وەسا دیارە هەتا ئۆکرانیا زیانێن مەزن نەگەهینتە رۆسیایێ ئەو ئێرشێن خوە ل دژی ئۆکرانیایێ نادەنە راگرتن.
ئەو یەک د دەمەکێ دایە کو حەفتیا بۆری سەرۆکێ ئەمریکا راگەهاند، ئەو دێ ب مەرج فرۆکێن شەڕی دەنە ئۆکرانیایێ و نابیت لەشکرێ ئۆکرانیایێ فرۆکێن شەرێ بۆ ئێرشکرنا ل سەر ئاخا رۆسیایێ بکار بینن.
بەرپرسێن ئێکەتیا ئۆرۆپا ژی دیار دکەن، شەڕێ نها د بەرژەوەندیا چو ئالیەکێ دا نینە و دڤێت رۆسیا ئێرشێن خوە بدەتە راگرتن، هەروەسا دڤێت رۆسیا هەموو هێزێن خوە ژ ئاخا ئۆکرانیایێ ڤەکێشیت.
