ئیدانهكرنا هێرشێن ئیرانێ ژ لایێ ئیراقێ ڤه بهس نینه
دلۆڤان ئهمجهد بارزانى
پشتى كو سۆپایى پاسدارێن ئیرانێ ب درۆنان هێرشهكا ناراستهوخوه كره سهر ههرێما كوردستانێ و سازیێن وێ كو تێدا چهند كهسێن سیڤیل مهدهنى بوونه قوربانیى، ههر زوى ئیرانێ راگههاند كو چهند بنكه و كونسولخانهیێن ئهمریكا و ئیسرائیل وان كرینه ئارمانج، لێ ئهو و ههمى جیهان دزانیت كو راست نینه، ئهوان ههرێما كوردستانێ كره ئارمانج تایبهتى ههولێرا پایتهخت، چونكى ئارمانجا وان تێكدانا ئارامیا سهروهرییا كوردستانى یه.
ئهم ههمى باش دزانین ئیران و دهولهتێن جیران چاڤ ب ئارامى و خوشگوزهرانى و پێشكهفتنا ههرێما كوردستانێ ب گشتى و ههولێرا پایتهخت ب تایبهتى رانابن.
ههر د كهڤن دا ئهڤان دژایهتیا كوردان كریه و ههمى ههولێن خوه دانه بۆ ژناڤبرنا كوردان. گۆتنهكا ههى دبێژن (دوژمنێن باب و كالا نابنه دۆستێن لاوا) یان (دهردى نهڤیانى دهردهكى گران و بى دهرمانه).
چهندهها جاره ئهڤ هێزێن ژ قانوونێ دهركهفتى؛ هێرشان دكهنه سهر كوردستانێ، لهوما ئهم وهكى ههڤوهلاتیێن ههرێمێ ب توندى ڤان هێرشێن دهولهتا نهئیسلامیا ئیرانى ئیدانه دكهین، لێ بتنێ ئیدانهكرن بهس نینه بۆ ڤان دوژمنێن رووى رهش و شهڕمهزار دڤێت ب زوویترین دهم ب هێز بهرسڤا وان بهێتهدان و باش بزانن نهئیران و ههر دهولهتهك و هێزهك نهشێن رهوشا ههرێمێ تێكبدهن، چونكى ئهڤ وهلاته ب خوینێ هاتیه ئاڤاكرن و بنادنان ب دهستێن چهپهلێن هیچ هێز و دهولهتهكێ ناهێته ژناڤبرن و بلا ئێدى خهونان ژى ب ژناڤبرنا كوردان نهبینن.
دیرۆك شاهدیێ بۆ وێ چهندێ ددهت كو دكهڤن دا ئهڤان و چهندین دهولهتێن دهى یێن دژكار چ دگهل كوردان پێچى نهبوویه و د نها ژى دا ئهستهمه خهونێن وان ب جێ بێن.
ئهگهر راست بێژن كو وان دڤێت بنگههێن و كونسولخانهیێن ئهمریكا و ئیسرائیل بكهنه ئارمانج بنگههێن گهلهك نێزیكتر یێن ههین كو بكهنه ئارمانج و هێرشا وان بكهن لى ئهڤه بتنێ بهانهنه بۆ خوه دئینن و بێهێزییا وانه ب هێرشێن ترسنۆكانه ئهنجامددهن.
جهێ شهڕمهزاریێ یه بو ئیرانى هێرشى ب درۆنان بكهنه سهر كهسانێن مهدهنى و بى گونهه و زارۆان، د ههمان دهم دا پێشێلكرنا مافێن مرۆڤانه، لهوما دڤێت ههمى دهولهتێن باس ل مافێن مرۆڤان دكهن بهێنه سهر خهت بۆ ئیدانهكرنا ڤان هێرشێن هۆڤانه و شهڕمهزار بكهن و سنوورهكى بۆ ڤى دهولهتا ب ناڤ ئیسلامى دانێن.
دهربارهى ڤان هێرشان، ڕابهر و مهرجهعێ بالایێ كوردستانى (سهرۆك بارزانى) پهیامهكێ ئاراستهى رایا گشتى دكهت دبێژیت: ئێدى دان ب خوه داگرتنى سنوورى ههى.
بۆ ڤهشارتنا ئاریشه و گرفتێن خوه ئهو دهستدرێژیى ل دژى ههولێر و خهلكى كوردستانى ئهنجامددهن.
نابیت ههتا سهرى ئهو ل ڤى زولمێ بهردهوامبن و نابیت ژى چى دى ل ههمبهرى ئهڤێ ستهم و نهحهقیێ بێدهنگ بین. دشێن مه بكۆژن لێ پشتراست بن نهشێن ئێرادێ مه بستینن.
ئهم ژى دبێژینه دوژمنێن گهلێ كورد هندى مه سهرۆكهك و رێبهرهك و مهرجهعهكێ وهكو بارزانى ههبیت كو بهردهوام د خهما مللهتێ كورد دایه؛ چ هێزهك نهشێت ئیرادهیا مه لاواز بكهن.
ههرێما كوردستانێ ههر دكهڤن دا نموونهیا پێكڤهژیان و ئێكسانى و ئێكتر قهبوولكرنا ههمى ئول و مهزههب و نهتهوان بوویه بێ جوداهى، نها ژى ل سایا بارزانى بهردهوامین ل سهر رێبازێ و دێ بهێزتر ژ جاران دبهردهوام بین.
دڤێت حوكمهتا ئیراقێ ژى ژدل بهێته سهرخهت كار ل سهر راگرتنا ڤان هێرشێن بێ بنهمایێن ئێك ل دویڤ ئێكێن ئیرانى بكهت، ئیدانه كرن و شهڕمهزاركرن بهس نینه بۆ تێكدان و پێشێلكرنا سهروهرییا ههرێمێ و ئیراقێ، ژبهر هندێ دبێژم ئیدانهكرن، بهس نینه چونكى ئهم تێر و بێزار بووین ژ ڤى گۆتنا بێ كریار ژلایێ ئیراقێ ڤه، ئهڤه ئێكهم جار نینه كو بێهنه ئیدانهكرن و ههر بهردهوامن ل سهر ڤان كریارێن كرێتێن خوه ئهگهر سنوورهك بۆ نههێته دانان، دبیت ئهڤ هێرشه مهزنترببن، تێكدانا خوشگوزهرانى و ئاسایشا و رهشا كوردستانێ تێكدانا ئاسایش و رهوشا ئیراقى یه، لهوما پێدڤیه بهرسڤهكا توندا سۆپایى پاسدارێن ئیرانى بهێتهدان و ڤان هێرشێن ترسنووكانه رابگرن، ئێدى بهسه بێزاربووین ل سهر ڤان كریاران، ئهڤه چهندین كهسێن بێگونههێن وهلاتى مه دهێنه شههیدكرن، ما ئهڤه تێرنابن ژ رێتنا خوینا كوردان؟.
وهزیرى بهرگرییا بهریتانیا بۆ ئیرانى دبێژیت:
(سهیێن خوه ببهستن و گرى بدهن، ئهگهر نه دى پان كهینهڤه و دى كهینه كهباب)
ئهڤه ئێكه ژ بهرسڤدانا كۆ ئێك ب قالبى دهولهتا ئیرانا نا ئیسلامى یه.
سهرۆكى حوكمهتا ههرێما كوردستانێ رێزدار (مهسررر بارزانى ) ب ڤى رهنگى بهرسڤا هێرشێن ئیرانێ ددهت و دبێژیت:
_ نابیت هێرشێن سهر ههولێرێ بێ بهرسڤ بمینهڤه.
_ ل هێرشهكا نهمهردانه دا ههولێر كره ئارمانج.
_ دڤێت پسیار بهێتهكرن بۆچى خهلكى سڤیل دكهنه ئارمانج.
_ هێرشێن وان بێ بهانه و بێ بنهمانه.
_ رێكێ بدهن ل وهلاتى خوه ب ئازادى بژین.
_ مه پێدڤیا ب پشتگیرى و پشتهڤانیا نێڤدهولهتى یا ههى بۆ سهقامگیریا وهلاتێ مه.
_ ههرێما كوردستانێ ژێدهرێ ئاشتى و سهقامگیریێ یه.
_ پێدڤیه حوكمهتا ئیراقى ههلوهستهكێ ژدل ههبیت بتنێ ئیدانه كرن نهبیت.
دڤێت نهتهوێن ئێكگرتى ژى ههلوهستێن رژد ههبن ل سهر ڤان هێرشێن ئیرانێ، چونكى ئهڤا دهێته روودان ههمى ژپێخهمهت وانایه كو ههردهم دبێژن ئارمانجا مه لێدانا بنكهیێن وانایه ل ههرێما كوردستانى، لهوما دڤێت بێدهنگ نهمینن و بێدهنگیێ بشكێنن بێژن ئێدى بهسه.
چونكى ئهو هێرشێن ئاسایش و سهروهرییا ئاخا ههرێمێ ب تایبهتى و ئیراقێ ب گشتى پێشێل دكهن، ژلایێ ههر ئالیهكى ڤه بن دڤێت بهێتهراگرتن.