ئیرادا پێشمه‌رگه‌ی جیهان سه‌رسورمان كریه
ل سالا (2003) و هێرڤه واته ل پشتی قووناغا ئازادكرنا عیراقێ ژ رژێما دكتاتۆرا به‌عس، پاشی دانانا یاسایا ده‌مكی د قووناغێن ڤه‌گوهاستنێ دا ؛ ل وی ده‌می زۆربه‌یا هێزێن سیاسیێن عه‌ره‌بێن شۆفینی ل به‌غدا هه‌می بزاڤ كرن داكو پێشمه‌رگه‌ی ب ملیشیات ب ناڤ بكه‌ن و هه‌تا ئه‌و قووناغ ب دووماهی دهێت پاشی بێخنه سه‌ر میلاكێ وه‌زاره‌تا ناڤخوه‌ڤه، له‌ورا وه‌كو هه‌ر جار سه‌رۆك بارزانی هاته سه‌ر خه‌تێ و خوه ل ڤێ كێشێ كره خودان و به‌ره‌ڤانیه‌كا بووێر ژێكر و رێك نه‌دا ناڤێ پێشمه‌رگه‌ی بهێته گوهۆرین و یا دیاره كو هه‌می ده‌مان ناڤێ پێشمه‌رگه‌ی ل ده‌ف سه‌رۆكێ هه‌رێمیێ هێلا سۆربوویه. واته ناڤێ پێشمه‌رگه‌ی كره واقعه‌ك و جێگیركر د دستوورێ عیراقا فیدرال دا و وه‌كو پاسه‌وانێن كوردستانێ هاتنه بناڤكرن و كره پشكه‌ك ژ سیسته‌مێ به‌ره‌ڤانیا عیراقێ و هه‌می پێدڤیێن له‌شكری ژ مووچه و چه‌ك و ته‌قه‌مه‌نی ب مافێ پێشمه‌رگه‌ی زانین داكو بۆ بهێته دابینكرن ژ لایێ وه‌زاره‌تا به‌رگریا عیراقێ ڤه.
مخابن ب درێژاهیا ده‌مێ (11) سالان ژ گرتنا ده‌ستهه‌لاتێ، ئێكه‌م كارناما كارێ حوكمه‌تا مالكی سزادانا خه‌لكێ كوردستانێ بوو ب تایبه‌تی سزادانا پێشمه‌رگه‌ی “وه نه‌ب تنێ پێدڤیێن له‌شكری نه‌دان به‌لكو مووچه‌یێن پێشمه‌رگه‌ی ژی بری و سه‌ره‌رای ڤێ ژی زۆر جاران هه‌ول ددا هێرشا له‌شكری بكه‌ته سه‌ر ده‌ڤه‌رێن كوردستانێ و باره‌گایێن پێشمه‌رگه‌ی “لێ هێزێن پێشمه‌رگه‌ی رێ نه‌دا پێشڤه‌چوونێ بكه‌ن.
ئه‌ڤرۆ كورد نه كوردێ جارانه و قووناغ ژی هاتیه گوهۆرین و كورد ژی ب هێزه و ئێكگرتیه” به‌رخودانا گه‌لێ كوردستانێ ب رێڤه‌به‌ریا سه‌رۆكێ پێشمه‌رگه (مه‌سعود بارزانی) سه‌ركه‌فتیه و دێ ل نێزیك خه‌ونێن گه‌لێ كورد كه‌ته راستی، راسته ل ڤان هه‌یڤێن بووری كاره‌ساتێن مه‌زن ب سه‌رێ ملله‌تێ مه هاتن ژ لایێ مالی و جانیڤه و زۆر ژ عه‌زیزێن مه شه‌هید و برینداربوون ب ده‌سێن درنده‌یێن (داعش) ڤه، لێ ژ رویێ سیاسی و دبلوماسی ڤه ده‌ستكه‌فتێن مه‌زن ب ده‌ست گه‌لێ كوردستانێ ڤه هاتن وه‌كو ئه‌ڤێن ل خوارێ دیار:
1. ب له‌ز هاتنا جڤاكێ ناڤنه‌ته‌وه‌ی ل دووڤ بانگه‌وازیا سه‌رۆكێ هه‌رێمێ و ئینانا هاریكاریێن له‌شكری ژ ته‌قه‌مه‌نیان و پێكئینانا هه‌ڤپه‌یمانیه‌كا نێڤده‌وله‌تی بۆ لێدانا باره‌گایێن تیرۆرستێن (داعش) ب رێیا هێزێن ئه‌سمانی.
2. بۆ ئه‌گه‌رێ ئێكرێزی و ئێك گۆتاریا هه‌می هێزێن سیاسیێن كوردستانێ ل سه‌ر ئاستێ كوردستانا مه‌زن و هه‌ر وه‌كو ب بریارا سه‌رۆكێ هه‌رێمێ (مه‌سعوود بارزانی) چوونا هێزا پێشمه‌رگه‌ی بۆ كوبانێ، هه‌روه‌سا پشكداریا هێزێن باكۆر و رۆژهه‌لات و رۆژئاڤا ل به‌رۆكێن شه‌ڕی ل باشۆرێ كورستانێ، له‌ورا گه‌لێ كورد بۆ دۆست و دوژمنان ئاشكه‌راكر كو كوردستان یا ب خودانه ژ ئه‌ڤرۆ وێڤه داگیركه‌ر نه‌شێن پشتا كوردان بچه‌مینن.
3. به‌رز و بلندبوونا ناڤێ پێشمه‌رگه‌ی ل جیهانێ، كو ئه‌ڤ هێزه یا بوویه هێمایێ وه‌لاتپارێزیێ و به‌رخودان و خوه‌راگری و چاڤنه‌ترسیێ، هه‌روه‌سا یێ بوویه هێمایێ به‌ره‌ڤانیكرنێ ژ به‌ریێ دیمۆكراسیێ و جیهانا ئازاد دژی هێزێن تارێی و تیرۆرستان.
4. ئه‌و به‌رژه‌وه‌ندی و باوه‌ریا ده‌وله‌تێن بریار ب ده‌سێن جیهانێ ل گه‌ل داگیركه‌رێن كوردستانێ هه‌ی یا كێمبووی، ئه‌ڤرۆ هه‌ڤلێرێ ئه‌و جه یێ گرتی.
5. كوردستان یا بوویه هێمایێ مرۆڤ دوستیێ ل ده‌ڤ جڤاكێ ناڤنه‌ته‌وه‌ی، له‌ورا یا بوویه جهێ ڤه‌حه‌ویانا نێزیكی (1200000) ئاواران ژ هه‌می ئاین و مه‌زهه‌بان، كورد سه‌ره‌ده‌ریێ ل گه‌ل ڤێ دۆسیێ دكه‌ت ب روحه‌كا رێزگرتن و براینی و لێبۆرینێ.
6. پاڵپشتیا هێزێن هه‌ڤپه‌یمان د زێده‌بوونێ دایه بۆ گه‌لێ كورد و هێزا پێشمه‌رگه‌ی ژ روویێ سیاسی و له‌شكری ڤه.
7. ئاماده‌بوونا سه‌رۆكێ پێشمه‌رگه (مه‌سعود بارزانی) راسته‌وخوه ل به‌رۆكێن شه‌ڕی و ئیراده‌یا هێزا پێشمه‌رگه‌ی ئه‌ڤرۆ جیهانا ئازاد یا سه‌رسام كری، له‌ورا نێزیكی (40) ئه‌ندامێن كۆنگرێسێ ئه‌مریكا رازیبووینه وه‌كو لۆبیه‌ك بۆ پشته‌ڤانیا داخوازیێن گه‌لێ كوردستانێ و بریار دایه و بۆ هه‌ڤلێرێ هه‌یه راسته‌وخوه چه‌كێ گران ژ ئه‌مریكا بكریت بێی پرسیارا به‌غدا بكه‌ت. ب راستی ئه‌ڤ هاریكاریه و پشته‌ڤانیه ده‌ستكه‌فتێن مه‌زنن بۆ ملله‌ته‌كێ بێ ده‌وله‌ت وه‌ك ملله‌تێ كورد، ئه‌ڤه دێ بیته هێزه‌كا پشته‌ڤانی بۆ پرۆژێ مه‌زن یێ بۆ راگه‌هاندنا ده‌وله‌تا كوردستانێ.
