ئیراقێ راهێنه‌ره‌كێ سربی ئینا و چار یاریزانێن كورد داخوازكرن
قەیس وەیس:
د داخویانیه‌كێ دا جێگرێ سه‌رۆكێ فدراسیۆنا باسكێت بۆلا ئیراقێ ڕاگه‌هاند ب فه‌رمی گرێبه‌ست دگه‌ل راهێنه‌ره‌كێ سربی هاته ئیمزاكر خوه به‌رهه‌ڤكرن بۆ قاره‌مانییا كۆپا عه‌ره‌بی و ڤاڤارتن بۆ كۆپا ئاسیا.
زێده‌تر د. خالد نه‌جم بۆ ده‌زگه‌هێن ڕاگه‌هاندنێ گۆت: پشتی گه‌نگه‌شه و دانۆستاندنێن به‌رده‌وام ب فه‌رمی ئه‌م گه‌هشتنه ڕێكه‌فتنێ دگه‌ل راهێنه‌رێ سربی فازلێن مایتچ ژبۆ سه‌رپه‌رشتیا هه‌لبژارتیێ ئیراقێ و عقیل نه‌جم وه‌كو هاریكارێ وی ل سه‌ر ئاستێ پێشكه‌فتیان خوه به‌رهه‌ڤكرن بۆ قاره‌مانیێن داهاتی و نێزكترینێ وان كۆپا عه‌ره‌بی ئه‌وا بڕیار هه‌ڤڕكیێ وێ وه‌لاتێ ئیماراتا ئێگكرتی ل هه‌شت هه‌تا 16ێ چرییا دویێ یا بهێت مێڤاندارییا وێ بكه‌ت.
هه‌روه‌سان ناڤهاتی ئه‌وچه‌نده ژی دیار كر ل حه‌فتییا بهێت دێ پلان بۆ كۆڤه‌كرنا هه‌لبژارتیێ ئیراقێ هێته كرن و دانانا ژڤان و جهه‌كی بۆ كه‌مپه‌كێ ڕاهێنانێ كو ل دووڤ پێشبینییان دێ ل 26ێ ڤێ مه‌هێ هه‌تا حه‌فتێ چرییا دویێ یا بهێت هێته ئه‌نجامدان، هه‌روه‌سان دێ به‌رهه‌ڤی ژی هه‌بن بۆ ڤاڤارتنێن كۆپا ئاسیا.
ل دووڤ ژێده‌رێن رۆژنامه‌ڤانی 18 یاریزان د ناڤا لیسته‌یا ده‌سپێكی یا هه‌لبژارتیێ ئیراقێ دا هه‌نه ژ وانا چار یاریزانێن كورد ئه‌و ژی، محه‌مه‌د عه‌لی و محه‌مه‌د محسن ژ یانه‌یا زاخۆ، فه‌رید ره‌عدی خه‌لكێ باژێرێ دهۆكێ ژ یانه‌یا كه‌رخ و محه‌مه‌د عه‌بدولخالق ژ هه‌ولێرا پایته‌خت و یانه‌یا غاز ئه‌لشیمال، دیسان دبیت یاریزانێ گه‌نج یێ یانه‌یا زاخۆ زنار هشیار ئه‌وێ ئاسته‌كێ به‌رچاڤ و باش نیشان دده‌ت.
