ئیراق ناهێلیت شوونوارێن دهۆكێ ل میراتێن جیهانی بهێنە توماركرن
دلۆڤان ئاكرەیی
رێڤەبەرێ شوونوار و كەلتووری ل پارێزگەها دهۆكێ راگەهاند، سەرەرای وێ چەندێ ئەو شیاینە د وەرزێ زفستانێدا كارێن چاندنێ وەكو زێدەكرنا كەسكاتییێ ل چیایێ زاوا و شكەفتا چارستین ئەنجام بدەن، ژبلی وێ د پێشانگەها مەزنا شوونواری كۆ ل ولاتێ ئیتالیا هاتبوو سازكرن، ب كوپییا نەخشەیەكێ نكراندی یێ شكەفتا هەلامەتان ل دهۆكێ پشكداربین و بهێتە نمایشكرن.
د. بێكەس بریفكانی، رێڤەبەرێ شوونوار و كەلتووری ل پارێزگەها دهۆكێ بۆ رۆژنامەیا ئەڤرۆ دیار كر، كار ل سەر پرۆژێ شكەفتا چارستین ١٠٠٪ ب دووماهی هاتییە، بەلێ ژبەر نەسەقامگییریا كەش و هەوای و ڤەكرنا وێ بۆ ڤێ مەهێ هاتیە پاشخستن و گۆت: پرۆژێ شوونواریێ چارستین كۆ دەڤەرەكا شوونوارییا گرنگە و كۆمەكا جهێن شوونواری ب خۆڤە دگریت، مینا جهێن پیشەسازی و هەبوونا كارگەهێن جودا یێن وی سەردەمی و ئەڤ جهێ شوونواری د بەرێدا كۆمەلگەهەكا ئایینێ زەردەشتییان بوویە و وان گرنگیەكا مەزن ب ڤی جهی دایە ب ئاوایەكی كۆ هەر ل ڤێ كۆمەلگەهێ د دێریندا ژبەر باوەرییا باوەردارێن ڤی ئایینی ب ئاڤ و ئاخ و هەوای كەسێن كۆ وەغەرا دووماهییێ دكرن ل بلنداهییا كێلیا شەدا شاردار دكرن.
زێدەتر گۆت: ژبەر گرنگییا ڤێ دەڤەرا شوونواری و بەرفرەهییا سنورێ وێ پلان دانایە كۆ ل گەل پارێزگەها دهۆكێ و سەروكاتیا باژێرڤانی و گەشت و گوزار و رێڤەبەرێیا كارەبا دهۆكێ ب هەڤرا رێكەكا دی ب شێوەیێ كەلەپوری بۆ كێلیا شەدا دروست بكەین كۆ هەم روناهی و هەم كەسكاتی و كامیرەیێن چاڤدێرییێ بخۆڤە بگریت و ل سەرێ چیایێ شەدا هەر دو رێ ل سەر ئەندازەیا سروشتی و كەلەپوری هەڤبگرن و ئەو رێكا ب ئاسنی هاتییە چێكرن بهێتە راكرن.
سەبارەت شكەفتا شوونواریا هەلامەتان ل دهۆكێ گۆت: ئەڤ شكەفتا هەنێ دەڤەرەكا شوونوارییا گرنگا دهۆكێیە كۆ بەرییا ٢٧٠٠ سالان هاتییە دروستكرن و د نۆكە دا ١١٠٠ مەترێن ئەردێ وێ هاتینە پەرجانكرن و تابلویێن شرۆڤەكرن و هایداركرن و كامیرەیێن چاڤدێریێ هاتینە هەلاویستن و رێیەك ژی بۆ ل چیایێ زاوا بۆ ڤی جهی هاتییە چێكرن كۆ تێدا ئاسنێ تایبەت ب شوونوارانڤە هاتیە ب كارئینان كۆ دگەل بورینا دەمی رەنگێ شوونواری و سرۆشتی ب خۆڤە دگریت و جۆدا ژ ڤان ئاڤاهییەك ژ دێ هێتە چێكرن بۆ چاڤدێری و رێڤەبرنا ڤی جهێ شوونواری.
دەربارەی پرۆژەیێن شوونواری ل سنورێ پارێزگەها دهۆكێ گۆت: د پلانا واندایە چێكرنا موزەخانەیەكا مەزن یا شوونواری هەیە كۆ ئەڤ موزەخانەیە دكەڤیتە ب رەخ ئاشێن كەڤن و دێرا بن ئەرد و كار ل سەر چێكرنا رێیەكا دی ژی دهێتە كرن كۆ چوون بۆ ڤی جهێ شوونواری ببیتە دو رێ، جودا ژێ وێ دنوكەدا ئەو مژوولی تەمامكرنا پرۆژێ پاركا شوونواریا دهۆكێ نە كۆ پشكەك ژ ڤی پاركێ شوونواری دكەڤیتە ناڤا پاركێ ئالۆكادا و یێن دی ژی چوار جهێن شوونواری مینا پاركا خنس و فەیدیێ و هەلامەت و جەروانە ب خۆڤە دگریت كۆ دنۆكەدا دو پارك ب دووماهی هاتینە، ئەو ژی خنس و فەیدیێیە و ٢٤ دەمژمێران دێ د خزمەتا وەلاتی و گەشتتیاراندا بیت و ب شەڤ و رۆژ ب رێیا رۆناهی و پاسەوان و چاڤدێر و رێبەران پێشوازیێ ل گەشتیار و سەرەدانكەران دهێتە كرن و ئەو پێشبینی دكەن ل دووماهیا سالا ٢٠٢٦ ئەو پروژێ شوونواری ب گشتی ب دووماهی بهێت.
سەبارەت تۆماركرنا شوونوارێن پارێزگەها دهۆكێ ل میراتێن جیهانێدا گۆت: وان بۆ چەندین جاران بزاڤ كرینە كۆ هەر ئێك ژێ دەڤەرێن ئامێدی و لالش و هند جهێن دی ب رێیا دوسەیا كۆ هاتییە ئامادەكرن ژلایێ رێڤەبەرییا وان ڤە ل یونوسكۆ بهێنە تۆماركرن، بەلێ ب مخابنیڤە بەردەوام حكومەتا فیدرال و تایبەت دەستەیا گشتییا شوونواران ل ئێراقێ رێگر بووینە ل توماركرنا دەڤەرێن شوونوارییێن دهۆكێ ل لیستا میراتێن جیهانی ـ یونوسكۆدا.
