ئیراق پشتی هەلبژارتنێ…د ناڤبەرا هیڤیا پڕانیا نیشتمانی و ترسێن سازانا سیاسی یا چەند پارتان دا
كاروان كێستەیی
ڕاگەهاندنا ئەنجامێن فەرمی یێن هەلبژارتنێن پەرلەمانی ئیراقێ، قووناغەكا نوی و هەستیار د پڕۆسەیا سیاسی یا وەلاتی دا ڤەكر. دەنگدان ئامرازێ سەرەكیێ نووكرنا شەرعیەتا دەستهەڵاتێ یە، لێ ڕێژەیا كێم یا پشكداریكرنێ، ئاماژەكا ئاشكرایە بۆ بێزاری و بێهیڤیبوونەكا مەزن د ناڤ جەماوەرێ ئیراقێ دا. ئەڤە پەیامەكا ڕاستەوخۆ بوو كو لایەنێن سیاسی یێن تەقلیدی هاتنە سزادان ب ڕێكا سندۆقێن دەنگدانێ.
ئەڤرۆ، چاڤ ل سەر قووناغا یاسایی یا داهاتی نە: پێكئینانا پەرلەمانێ نوو و پشتڕا كابینەیا نوو یا حوكمەتا ئیراقێ. ئەڤ پڕۆسەیا دەستووری، كو دڤێت ب لەز و ب ساناهی بڕێڤە بچیت، دیسا كەفتیە د ناڤ گڕێكا ململانێیێن نێڤخۆیی و كارتێكرنێن دەرەكی دا.
پسیارا گرنگ ل ڤێرێ ئەڤەیە: ئەرێ دێ لایەنێن سەركەفتی هێشتا ب مۆدێلا سازانا سیاسی یا كەڤن ڤە گرێدای بن، ئەو سازانا كو وەلات ب دەمەكێ درێژ ژ كارئێخست و گەندەلی بەرفرەهتركر؛ یان دێ ل سەر پێكئینانا حوكمەتا پرانیا نیشتمانی یا ڕاستەقینە ڕێككەڤن؟ حوكمەتەك كو دێ بەرپرسایەتیێ ب شێوەیەكێ ئاشكرا هەلگریت و ڕێ دەتە ئۆپۆزسیۆنەكا نیشتمانی یا ب هێز كو رۆلێ چاڤدێریێ ببینیت.
پێكئینانا حوكمەتا نوو دڤێت ڤەگێڕەكا سەروەری و بڕیارێن نیشتمانی بیت. دەستێوەردانێن هەرێمی و گرێدانا دۆسەیا ئیراقێ ب ململانێیێن زلهێزان ڤە، زۆر جاران پڕۆسەیا سیاسی ب هەڤدژ و زەحمەت كریە. كابینەیا نوو دڤێت ب وێرەكی بڕیارێن خوە ژ هەر كارتێكرنەكا دەرەكی دوور بێخیت و بەرژەوەندییا گەل بكەتە سەروەری.
ژ ئالیێ هەرێمێ ڤە، رۆلێ كوردان د حوكمەتا نوو یا ئیراقێ دا یێ گرنگە. لێ سەركەفتنا ڤی رۆلی گرێدایە ب ئێكگرتنا هەلوەستێ كوردی و داكۆكیكرن ل مافێن دەستووری و چارەسەركرنا كێشەیێن درێژخایەن (وەكو نەفت، بودجە و مووچە و لاپەرەیێن ناكۆك). دڤێت كورد ب ئێك دەنگ ب ئالییێ بەغدا ڤە بچن دا نەبنە ئامراز بۆ ڕێككەفتنێن لایەنێن دی.
ئەركێ حوكمەتا نوو، ئەركێ ئاڤاكرن و چێكرنێ یە. ئەركێ وێ تەنێ دابەشكرنا پۆستان نینە؛ بەلكو شەڕێ ڕاستەقینەیە ل دژی گەندەڵی، ڤەگەڕاندنا سزایێ یاسایی و پێشكێشكرنا خزمەتگۆزاریێن سەرەكی (وەكو كارەبا و ئاڤ) كو ب مافێ هەڤوەلاتییانە. دۆمكرن و درێژكرنا پڕۆسەیا پێكئینانا كابینەیێ، تەنێ دێ بێهیڤیبوونا جەماوەرێ ئیراقێ زێدەتر كەت و سەقامگیریا وەلاتی ژ ناڤ بەت.
داخوازێ ژ هەموو لایەنێن سەركەفتی دكەین، بەرژەوەندییا نیشتمانی بكەنە بنیات و ب لەز و پشتبەستن ب دەستوورێ وەلاتی، حوكمەتەكا بهێز و كارا پێك بینن. هیڤیا گەل ئەڤەیە كو حوكمەتا نوو، حوكمەتا چارەسەركرنێ بیت، نە حوكمەتا بەردەوامیدان ب قەیرانان!
