ئیران، هرچا دیاره و ده‌وسا به‌تاله
عزه‌ت
به‌ریا هه‌ر تشته‌كى قه‌دا و سه‌د قه‌دا ب هه‌مى دوژمن و داگیركه‌ران بكه‌ڤیت، ل هه‌ر ده‌مه‌كى و ل هه‌ر واره‌كى بیت. نه‌فره‌ت ب هه‌مى دوژمنێن مرۆڤاتیێ و كوردان بكه‌ڤیت، به‌ڵا ب ئیرانا مووشه‌ك هاڤێژ و ب توركیا درۆن كژ و ب ئیراقا مووچه‌بڕ بكه‌ڤیت، قه‌دا و به‌ڵا ب داگیركه‌ر و نه‌حه‌زێن كورد و كوردستانێ بكه‌ڤیت.
دوژمن هه‌مبه‌ر كوردان یه‌ك هه‌ست و هه‌لوه‌ستن، لێ هێشتا كورد همبه‌رى وان د پرت و به‌لاڤن. ئه‌ڤه هه‌یامه‌كا ئیران یا دڕ و هار بووى، ل ڤێ داویێ ژى ب مۆشه‌كان هێرش كره سه‌ر هه‌ولێرا پایته‌خت، بێى كو ره‌واتیه‌ك بۆ هه‌بیت. همبه‌ر دا وه‌لاتیێن كورد دژى ئه‌ڤێ ره‌فتارا هۆڤانه رژیانه سه‌رجادان و نه‌رازیبوونا خۆ ده‌ربڕین كو ئێك ژ چه‌كێ وان ئه‌ڤه‌یه. لێ پتر جهێ ئیشانێ یه، كو هه‌بوون ره‌واتى د دا ئه‌ڤێ هێرشێ و وێنه‌یێن فۆتوشۆپى دباراندن.
سه‌رده‌مه‌ك هه‌بوو، ئیرانێ درووشمه‌كێ سه‌رڤه‌یى هه‌بوو، ئه‌و ژى: مه‌رگ به‌ر ئه‌مریكا، مه‌رگ به‌ر ئیسرائیل بوو. لێ نه ئه‌مریكا مر و نه ئیسرائیل ژ ناڤچوو. به‌روڤاژى هه‌یامه‌كه ئیسرائیل هێرشێ دكه‌ته‌سه‌ر سه‌ر هێزێن ئیرانێ و ملیشیایێن وان و به‌رپرسێن وان دكوژیت، سوپایێ پاسداران ژى د همبه‌ر دا هێرشه‌كا مووشه‌كى ب هێجه‌تێن ناره‌وا و نه‌وه‌یى ل سه‌ر هه‌ولێرێ كر و زارۆك شه‌هیدكرن و وێنه‌یێن شه‌هیدان فۆتوشۆپ نیشاندان.
ئه‌ڤرۆ ب ده‌نگه‌كێ بلند دبێژینه ئیرانێ، ئه‌وێن د گۆتن مه نه‌هێلا ئیسرائیلا دوێ دروست ببیت، هزرا وه یا ژه‌نگییه، ئیسرائیلا ئێكێ یا دیاره و قه‌بێ وه دخوازیت، گه‌ر راست دخازن هێرشێ بكه‌نه سه‌ر به‌رژه‌وه‌ندى و كه‌ساتییێن ئیسرائیلێ و مه‌رگى ب سه‌ر دا ببارینن، هرچا دیاره و ده‌وسا به‌تاله، فه‌رموون ل گه‌له‌ك جهێن رۆهه‌لاتا ناڤین دیارن، فه‌رموون ئه‌وێنهه ل ده‌وله‌تێن كه‌نداڤى ب تنێ ئاڤ دناڤبه‌را وه دا هه‌یه و هه‌تا تۆپێن هه‌وه یێن دویرهاڤێژ ژى دگه‌هنێ كێ ده‌ستێ وه گرتییه!
هێرشا ل سه‌ر هه‌ولێر ره‌فتاره‌كا بێ بنه‌ما بوو، ئه‌مریكا حوسیان ل یه‌مه‌نێ و ئیسرائیلێ ئه‌فسه‌رێن ئیرانێ ل دیمه‌شقێ دكوژیت و ئیران ژى هێرشێ ل سه‌ر هه‌ولێرێ دكه‌ت، شوینا مه‌رگ به‌ر ئه‌مریكا، مه‌رگێ نیشانێ كوردان دده‌ت. لێ ئه‌و چاك دزانن كو كوردان ئیراده‌یا خۆراگریێ و وێره‌كیێ هه‌یه و چه‌كێ كیمیاوى ئه‌نفالان كوردا بێ ئیراده نه‌كرینه.
گه‌ر كوردستان ژى وه‌ك پاكستان ده‌وله‌تبا دا دربه‌كێ دژوارتر داوه‌شینتێ و دا ئیرانێ ناچار كه‌ت په‌شیمان ببا و هه‌روه‌كى چه‌وا دێ سه‌رده‌نا پاكستانێ كه‌ن و داخوازا لێبۆرینێ ژێ كه‌ن و دێ بێژنێ مه كر و هوین نه‌كه‌ن.
یا دهێته سه‌رێ مه كوردان هه‌مى ژ بێ ده‌وله‌تیا مه‌یه، مه باش زانى كو رامانا بێ ده‌وله‌تى چییه، ده‌مێ دایكێ گازى كوڕێ خۆ دكر و د گۆتێ هه‌ى بێ ده‌وله‌توو.
ل داویێ كو ل گه‌ل دوژمنان ب داوى ناهێت، دبێژینه خۆدان دڕۆن و مووشه‌كێن تڕسنۆك، زمانێ جه‌هنه‌مێ زمانێ هه‌وه‌یه، زمانێ به‌هه‌شتێ ژى زمانێ به‌لاتینك و چویچكانه، وه‌ك چویچكا ژینا.
گۆتنا سه‌یدایێ (ع. مزوورى) هاته بیرا من، ده‌مێ ل سالا 1974 ل سه‌ر ئێزگێ ده‌نگێ كوردستانێ د خۆڕى و دگۆت مرن و سه‌رشۆڕى و نه‌مان بۆ هه‌مى خائینان و دوژمنان.
