ئیرانێ به‌رهه‌ڤیا خوه بۆ رێككه‌فتنه‌كا نوو ل گه‌ل ئه‌مریكا دیار كر
ئه‌ڤرۆ:
عه‌لی باقری جێگرێ وه‌زیرێ ده‌رڤه یێ ئیرانێ و به‌رپرسێ تیما ئیرانێ یا بۆ دانوستاندنێن به‌رنامێ ئه‌تۆمی راگه‌هاند كو ئیرانێ دڤێت پرسا به‌رنامێ ئه‌تۆمی ب رێیا دانوستاندنان بهێته چاره‌سه‌ركرن، به‌ری نها ژی وان به‌رهه‌ڤیا خوه بۆ رێككه‌فتنێ دیار كرینه لێ هه‌لوه‌ستێ ئه‌مریكا هه‌تا نها ژی تونده و هه‌كه ئه‌مریكا گوهۆرینان د هه‌لوه‌ستێ خوه دا بكه‌ت ئیران به‌رهه‌ڤه ل گه‌ل ئه‌مریكا رێككه‌فتنا ئه‌تۆمی ئیمزا بكه‌ت.
ناڤهاتی ئه‌و یه‌ك ژی دیار كر كو د سه‌رده‌مێ ترامپی دا ئه‌مریكا خوه ژ رێككه‌فتنا ئه‌تۆمی ڤه‌كێشا و ژ ئه‌نجامێ هه‌لوه‌ستێ خراب یێ ترامپی زیانێن مه‌زن گه‌هشتنه هه‌ر دو ئالیان، لێ نها ئیرانێ دڤێت ده‌ست ب قۆناغه‌كا نوو بكه‌ت و ئیران به‌رهه‌ڤه ل گه‌ل ئه‌مریكا رێككه‌ڤیت لێ ژ بۆ هندێ ژی دڤێت ئه‌مریكا ده‌ست ب قۆناغه‌كا نوو بكه‌ت.
ئه‌و یه‌ك د ده‌مه‌كێ دایه كو به‌ری چه‌ند رۆژان وه‌زاره‌تا ده‌رڤه یا ئه‌مریكا ب توندی هۆشداری دا ئیرانێ كو ده‌ستان ژ دروستكرنا چه‌كێن ئه‌تۆمی به‌رده‌ت و مه‌رجێن رێككه‌فتنه‌كا نوو یا ئه‌تۆمی قه‌بوول بكه‌ت، چونكی هه‌ر بزاڤه‌كا ب مه‌ترسی یا ئیرانێ بێی به‌رسڤ نامینیت و ئه‌مریكا دێ ب توندی به‌رسڤا بزاڤێن ئیرانێ ده‌ت.
چاڤدێرێن سیاسی ژی دیار دكه‌ن كو نها ره‌وشا ئیرانێ گه‌له‌ك خرابه، ب تایبه‌تی ژی د بیاڤێ ئابووری دا رۆژ ب رۆژێ ره‌وشا ئیرانێ خراب دبیت و ژ به‌ر هندێ ژی ئیرانێ دڤێت ب رێیا رێككه‌فتنه‌كا نوو ل گه‌ل ئه‌مریكا وه‌سا بكه‌ت دا ئه‌مریكا سزایێن ئابووری یێن ل سه‌ر ئیرانێ راكه‌ت، لێ به‌ری نها به‌رپرسێن ئه‌مریكا دیار كربوون هه‌تا ئیران ب كریاری هنده‌ك پێنگاڤان نه‌هاڤێژیت سزایێن ل سه‌ر ئیرانێ نا‌هێنه راكرن و ره‌نگه ئه‌مریكا هنده‌ك سزایێن نوو ژی ل سه‌ر ئیرانێ بسه‌پینیت، ژ به‌ر هندێ ژی ڤێجارێ ئیرانێ دڤێت ب هه‌ر ره‌نگێ هه‌ی ل گه‌ل ئه‌مریكا رێككه‌فتنه‌كا نوو ئیمزا بكه‌ت دا بشێت كاریگه‌ریا قه‌یرانا ئابووری كێم بكه‌ت.
