ئیرانێ بەری ئێرشا ئەمریکا هەموو فەرماندارێن خـوە ژ ســووریێ ڤـەکێشان
ئاژانسەکا جیهانی دیار دکەت، بەری ئێرشا ئەمریکا یا ل سووریێ، ئیرانێ هەموو فەرماندارێن خوە ژ سووریێ ڤەکێشان و ژ بەر ڤێ یەکێ ژی د ئەنجاما ئێرشێن ڤێ دووماهیێ یێن ئەمریکا دا بۆ سەر هێزێن سەر ب ئیرانێ ڤە چو زیانەکا وەسا نەگەهشتیە ئیرانێ.
ئاژانسا رویتەرز یا نووچەیان د راپۆرتەکێ دا دیار دکەت، بەری ئەمریکا ئێرش بکەت هەر رۆژ بەرپرسێن وی وەلاتی داخۆیانی ددان و دگۆتن ئەو دێ ئێرش کەن، ئیرانێ ژی بەری کو ئەمریکا ئێرش بکەت هەموو فەرماندارێن خوە یێن ل سووریێ ڤەکێشان دا چو زیان نەگەهیتە وان، د ئەنجاما ئێرشێن ڤێ دووماهیێ یێن ل سووریێ و ئیراقێ دا چو زیانەکا وەسا نەگەهشتیە هێزێن ئیرانێ، تنێ زیان گەهشتیە هێزێن چەکدارێن سەر ب ئیرانێ ڤە ل سووریێ و ئیراقێ و ئەو یەک ژی بۆ ئیرانێ یا گرنگ نینە.
د ڤێ دەربارێ دا عەلی داوودی چاڤدێرێ سیاسی ژی دیار دکەت، یا نها روو ددەت شەڕەکێ تەوافقی یە د ناڤبەرا ئیرانێ و ئەمریکا دا، چونکی ئەمریکا ب رەنگەکێ راستەوخوە ئێرشی ئیرانێ ناکەت و ئێرشێن ئەمریکا ل سەر ئاخا ئیرانێ نەبووینە، ئیران ژی هەمان هەلوەست هەیە، ژ بەر ڤێ یەکێ یێن نها دبنە قوربانیا شەرێ ئەمریکا و ئیرانێ هەر دو وەلاتێن ئیراق و سووریێ نە، ئەو یەک ژی نیشا ددەت تێگەهشتنەکا باش د ناڤبەرا ئیرانێ و ئەمریکا دا هەیە و هەر دو ئالی مەترسیان بۆ بەرژەوەندیێن هەڤدو دروست ناکەن.
ناڤهاتی ئەو یەک ژی دیار کریە، د رەوشا نها یا ئالۆز ل دەڤەرێ دا ئێرشێن بەردەوام یێن گرۆپێن چەکدار سەر ب ئیرانێ و ئێرشێن ڤێ دووماهیێ یێن ئەمریکا ل سووریێ و ئیراقێ دێ بیتە ئەگەرێ ڤێ یەکێ رەوشا هەر دو وەلاتێن ئیراق و سووریێ پتر ئالۆز ببن، چونکی ئیران و ئەمریکا شەڕێ خوە ل سەر ئاخا ئیراقێ و سووریێ دکەن و زیان دگەهیتە هەر دو وەلاتان.
چاڤدێرێن سیاسی ژی دیار دکەن، ئێرشێن ڤێ دووماهیێ یێن ئەمریکا بۆ سەر هێزێن سەر ب ئیرانێ ڤە ل ئیراقێ و سووریێ تنێ بۆ رازیکرنا رایا گشتی یا ناڤخوەیی یا ئەمریکا یە، چونکی ئەمریکا بەری نها ژی چەندین جاران دیار کریە وان نەڤێت شەڕێ ئیرانێ بکەن و یا نها روو ددەت پتر بۆ ئێکلاکرنا هندەک ناکۆکیێن نوو یە ل دەڤەرێ، بێگومان ژ بەر ڤێ یەکێ ژی دێ زیان گەهیتە ئیراقێ و سووریێ، ژ بەر ڤێ یەکێ ژی دڤێت ئیراق رێ نەدەت ئیران وەلاتێ وان بکەتە مەیدانا ئێکلاکرنا ناکۆکیێن خوە ل گەل ئەمریکا، چونکی بەردەوامیا رەوشا نها دێ زیانێن خوە یێن گەلەک مەزن بۆ ئیراقێ هەبیت و دڤێت حوکمەت و خەلکێ ئیراقێ ڤێ یەکێ قەبوول نەکەن.
