ئیرانێ ب دەھان کورد ل سێدارە دان
ئەڤرۆ نیوز:
رێکخراوا مافێ مرۆڤی یا رۆژھەلاتێ کوردستانێ د راپۆرتەکێ دا راگەھاند کو پشتی روودانێن ل مھابادێ سێدارەدانا کوردان ل ئیرانێ ب رەنگەکێ نەچاڤەرێ کری زێدە بوویە و د ھەفتیا بۆری ٧٨ کورد کو ھندەک ژ وان ژی گرتیێن خوەنیشادانا مھابادێ بوون ژ ئالیێ رژێما ئیرانێ ڤە ھاتینە سێدارەدان.
عرفان شەھرامی ئەندامێ رێکخراوا مافێ مرۆڤی یا رۆژھەلاتێ کوردستانێ د داخۆیانیەکێ دا بۆ رۆژناما ئەڤرۆ راگەھاند کو پشتی خوەنیشادانێن ل مھابادێ و پێشڤەچوونێن ل پارچێن دی یێن کوردستانێ رژێما ئیرانێ زۆرداریا خوە یا ل سەر کوردان گەلەک زێدە کریە و نھا ب ھزاران لاوێن کورد ل ئیرانێ د زیندانان دانە و د رەوشەکا گەلەک خراب دا دژین و گۆت: (رێژا سێدارەدانێ ب رەنگەکێ بەرچاڤ زێدە بوویە، ل گۆر زانیاریێن گەھشتنە دەستێ مە ھەفتیا بۆری ٧٨ گرتیێن کورد کو ھندەک ژ وان ژی گرتیێن خوەنیشادانا مھابادێ بوون ھاتینە سێدارەدان و ھەروەسا رێژەکا دی یا لاوێن کورد ھاتینە گرتن و چارەنڤیسێ وان ژی دیار نینە).
ناڤھاتی د بەردەوامیا ئاخڤتنا خوە دا ئەو یەک ژی دیار کر کو رۆژانە ل تاخێن باژارێن رۆژھەلاتێ کوردستانێ ھێزێن ئێمناھیێ یێن ئیرانێ دەست ب ئۆپەراسیۆنان دکەن و ب بەھانا ھەبوونا کەسێن دژبەرێن رژێما ئیرانێ لاوێن کورد دەستەسەر دکەن، نھا ترسەکا گەلەک مەزن ل دەف خەلکێ دروست بوویە، چونکو بێی چو بەلگەیەکێ رۆژانە ب دەھان کەسان دەستەسەر دکەن و ئەو کەسە تووشی ئەشکەنجەدانێ دبن و مالبات و کەسوکارێ وان ژی نەشێن چ بکەن و گۆت: (براستی نھا رەوشەکا گەلەک خراب ل رۆژھەلاتێ کوردستانێ ھەیە، تشتێ دیار دبیت ئەو ئۆپەراسیۆن و گرتن و سێدارەدانا کوردان بۆ ھندێ ڤەدگەریت دا کوردان چاڤترسی بکەن، چونکو ترسەکا مەزن ل دەڤ بەرپرسێن ئیرانێ دروست بوویە کو پشتی پێشڤەچوونێن ل ھەرێما کوردستانێ، رۆژئاڤا و باکور جارەکا دی ل رۆژھەلاتێ کوردستانێ ژی خوەنیشادان دەستپێ بکەن و ژ بەر ھندێ ژی وان دەست ب سێدارەدان و گرتنا لاوێن کورد کرینە).