ئیرانێ دڤێت ئێرشی گەمیێن ئسرائیلێ بکەت
ئەڤرۆ
ل گۆر راپۆرتەکا ئاژانسا رویترز یا نووچەیان دەزگەهێ هەوالگیریێ یێ ئەمریکا زانیاریێن دروست بدەستڤە ئیناینە کو نیشا ددەت ئیرانێ دڤێت ب رێیا درۆنان ئێرشی گەمیێن بازرگانی یێن ئسرائیلێ بکەت، ژ بەر هندێ ژی ئیرانێ گەلەک درۆن ئامادە کرینە، ئیرانێ دڤێت ب رێیا ئێرشەکا وەسا هەڤخەمیا خۆ بۆ لوبنانێ و گەلێ فەلەستینێ نیشا بدەت و جارەکا دی رەوشا دەڤەرێ ئالۆز بکەت.
ل ئالیێ دی بەرپرسەکێ وەزارەتا بەرگریێ یا ئسرائیلێ ژی دیار کریە، ئەو بەردەوام دووڤچوونا بزاڤێن ئیرانێ دکەن، هەر ئێرشەک ژ ئالیێ ئیرانێ ڤە ل سەر گەمیێن ئسرائیلێ یان ژی هەر جهەکێ دی بهێتە کرن ئسرائیل دێ بەرسڤەکا گەلەک دژوار دەتە ئیرانێ، ژ بەر هندێ ژی بۆ ئیرانێ باشترە نها دەست ب کارەکێ وەسا مەترسیدار نەکەت.
هەرچەندە هەتا نها بەرپرسێن ئیرانێ سەبارەت ب ڤی بابەتی چو داخۆیانیێن فەرمی نەداینە، لێ چاڤدێرێن سیاسی دیار دکەن نها پەیوەندیێن ئیرانێ و ئسرائیلێ گەلەک د خرابن، چونکی ئسرائیل ژ رێککەفتنا د ناڤبەرا ئیرانێ و سعوودیێ ژی دلگرانە، ئسرائیلێ دڤێت پێگەهێ ئیرانێ ل دەڤەرێ پتر لاواز بکەت، چونکی ئسرائیل دزانیت هەکە ئیران پەیوەندیێن خۆ ل گەل سعوودیێ باش بکەت ئەو یەک دێ بیتە ئەگەرێ بهێزبوونا ئیرانێ، ئیرانەکا بهێز ژی دێ مەترسیێن مەزن بۆ بەرژەوەندیێن ئسرائیلێ ل دەڤەرێ دروست کەت.
