ئیرانێ نەڤێت چو داخوازیێن ئەمریکا قەبوول بکەت
ب، سهرجان مەحمود:
چاڤدێرێن سیاسی دیار دکەن پشتی ئیرانێ شیا دو فرۆکەیێن ئەمریکا بێخیتە خوارێ نها ل گۆر بەرپرسێن ئیرانێ رەوشا شەڕی هاتیە گوهۆڕین و ئەو دشێن زیانێن زێدەتر بگەهیننە ئەمریکا و ئسرائیلێ و ژ بەر ڤێ یەکێ ژی نها ئیران بەرهەڤ نینە چو داخوازیێن ئەمریکا قەبوول بکەت.
د. هێمن سەیدی چاڤدێرێ سیاسی یێ خەلکێ رۆژهەلاتێ کوردستانێ دیار کر، بێگومان هەتا نها ژ ئەنجامێ شەڕی زیانێن گەلەک مەزن گەهشتینە ئیرانێ، ژ بلی کوشتنا رێبەرێ ئیرانێ نها ئەم دبینین ژێرخانا ئابووری یا ئیرانێ ژی وێران دبیت، لێ د هەمان دەمی دا ئیران بەرهەڤ نینە داخوازیێن ئەمریکا قەبوول بکەت، چونکی ئیرانێ شیایە دو فرۆکەیێن ئەمریکا بێخیتە خوارێ و دیارە رۆسیا چەکێ نوو دایە ئیرانێ و ژ بەر ڤێ یەکێ ژی نها بەرپرسێن ئیرانێ دخوازن شەڕ بەردەوام بیت هەتا کو ئەمریکا و ئسرائیل نەچار بن شەڕی بدەنە راگرتن و گۆت: (ل ئالیێ دی ئەمریکا و ئسرائیل ژی دخوازن ئیران داخوازیێن وان قەبوول بکەت یان ژی دێ رژێمێ گوهۆڕن، ژ بەر ڤێ یەکێ ژی هەتا نها چو ئاماژە نینن کو دێ شەڕ هێتە راگرتن).
مەیسەم مورادی چاڤدێرێ سیاسی ژی دیار کر، ڤێ دووماهیێ مە دیت ئەمریکا و ئسرائیل یێ ب توندی ئێرشی بنگەهێن ئابووری و وزێ یێ ئیرانێ دکەن و هەری دووماهیێ ژی ئێرشێ دەروازەیێن سنوری یێن د ناڤبەرا ئیراقێ و ئیرانێ دا هاتە کرن، ئەو یەک ژی پێشهاتەیەک نوو یە و دیارە ئەمریکا دڤێت وەسا رێگریێ ل چوونا چەکدارێن حەشدا شەعبی بۆ ئیرانێ بکەت و گۆت: (ئێخستنا دو فرۆکەیان ژی نیشا ددەت کو ئیرانێ شیایە چەکێ نوو بدەستڤە بینیت و ژ بەر ڤێ یەکێ ژی نها بەرپرسێن ئیرانێ بەرهەڤ نینن چو رێککەفتنان بکەن، ئەو یەک ژی نیشا ددەت دێ شەڕ ب دژواری بەردەوام بیت و بێگومان بەردەوامیا شەڕی دێ بیتە ئەگەرێ وێرانیێن گەلەک مەزنتر ژ نها ل ئیرانێ).
ل ئالیێ دی گەلەک ژ چاڤدێرێن سیاسی دیار دکەن، رۆسیا مفادارا سەرەکی یا شەڕی یە و دیارە رۆسیا چەکێ نوو دایە ئیرانێ و بەرپرسێن ئیرانێ ژی وەسا دبینن هەکە شەڕ بۆ دەمەکێ دی بەردەوام بیت و ئەو بشێن فرۆکەیێن زێدەتر ژناڤ ببەن دێ ئەمریکا و ئسرائیل نەچار بن شەڕی راگرن و بێگومان د رەوشەکا وەسا دا راگرتنا شەڕی بۆ ئیرانێ وەکو سەرکەفتنە، لێ د هەمان دەمی دا ترامپی نەڤێت بێی دەستکەفتنێن مەزن شەڕی بدەتە راگرتن، ژ بەر ڤان خالان ژی دبیت د چەند رۆژێن بهێت دا ئێرشێن ل سەر ژێرخانا ئابووری و وزێ ل ئیرانێ دژوارتر ببن و ئیران ژی بزاڤا ڤێ یەکێ بکەت زیانێن مەزنتر بگەهینتە بەرژەوەندیێن ئەمریکا ل دەڤەرێ.
