ئیرانێ هاتنوچوونا گه‌شتیارێن هه‌رێمێ راوه‌ستاندیه
ئه‌ڤرۆ:
رێڤه‌به‌رێ ده‌رگه‌هێ سنووریێ حاجی ئومه‌ران مه‌سعود باتێلی، دیار كر كو هاتنوچوونا گه‌شتیاران د ناڤبه‌را هه‌رێما كوردستانێ و ئیرانێ دا راوه‌ستیایه.
باتێلی راگه‌هاند، مه رێككه‌فتن دگه‌ل لایه‌نێ ئیرانی ل سه‌ر راوه‌ستاندنا لێكگوهارتنا بازرگانی د رۆژا ئێكێ یا جه‌ژنا قوربانیا پیرۆز دا كربوو، ژبلی رۆژا ئێكێ یا جه‌ژنێ، لڤینا بازرگانی د ناڤبه‌را هه‌ردو لایه‌نان دا یا به‌رده‌وام بوو و هه‌تا نوكه ژی یا به‌رده‌وامه و بێی ئاسته‌نگ.
سه‌باره‌ت گه‌شتیاران ژی ناڤهاتی گۆت: “لڤینا گه‌شت و گۆزاری یا راوه‌ستیایه و ئیرانێ ئه‌ڤ چه‌نده ژ ئه‌گه‌رێ كۆرۆنایێ كریه، ب تنێ هنده‌ك كه‌س دشێن گه‌شتێ بكه‌ن و د ره‌وشێن تایبه‌ت دا، وه‌ك نه‌ساخی و بازرگانی و دبلوماسی”.
و ئاماژه ژی دا كو ئیران ناهێلیت ژ هه‌ردو لایه‌نان هاتنوچوون بهێته كرن، به‌لێ ئه‌م ل هه‌رێمێ مه چ ئاریشه نینه كو ئێك گه‌شتێ ژ ئیرانێ بۆ هه‌رێمێ یان ژ هه‌رێمێ بۆ ئیرانێ بكه‌ت.
