ئیرانێ گەلەک کورد ل سێدارە داینە
رێکخستنا مافێن مرۆڤی یا رۆژهەلاتێ کوردستانێ دیار کر، ئەڤسالە ل گۆر سالا بۆری رێژەیا سێدارەدانا چالاکڤانان و گرتیان ل ئیرانێ زێدە بوویە و هەری زێدە کەسێن هاتینە سێدارەدان ژی کوردن و ئەو یەک نیشا ددەت کو بەرۆڤاژی تشتێن بەرپرسێن ئیرانێ دبێژن ئەو رۆژانە کوردان ل سێدارە ددەن و د ناڤ سێ رۆژێن بۆری دا ئیرانێ ١٠ گرتیێن سیاسی ل سێدارە داینە کو ٧ ژ وان کەسان ژی کوردن.
هەمان رێکخستنێ ئەو یەک ژی دیار کریە، ژ بەر دانوستاندنێن نها د ناڤبەرا ئیرانێ و ئەمریکا دا رێکخستنێن مافێن مرۆڤی و وەلاتێن کو رۆژانە بەحسێ مافێن مرۆڤی دکەن گرنگیێ نادەنە رەوشا ناڤخوەیی یا ئیرانێ و ل هەمبەر سێدارەدانا چالاکڤانان و گرتیێن سیاسی ژی بێدەنگن، ژ بەر ڤێ یەکێ ژی دەستهەلاتا ئیرانێ بۆ ترساندنا خەلکی رۆژانە گرتیێن سیاسی ل سێدارە ددەت.
