ئیران: ئەم چەکی نادەینە حەماسێ
وەزیرێ دەرڤە یێ ئیرانێ راگەهاند، ئیران ب چو رەنگەکێ چەکی نادەتە حەماسێ و حەماس نها بۆ خوە چەکی دابین دکەت و گەلەک چەکان ژی دروست دکەت، هەروەسا ئیرانێ چو رۆل د ئێرشا حەماسێ یا ل سەر ئسرائیلێ دا نەبوویە و ئیرانێ دڤێت شەڕێ نها یێ د ناڤبەرا ئسرائیلێ و حەماسێ دا ب دووماهی بهێت، چونکی نها رەوشا رۆژهەلاتا ناڤین ب گشتی گەلەک یا ئالۆزە و ئیرانێ نەڤێت رەوشا هەی پتر ئالۆز ببیت.
حسێن ئەمیر عەبدوللاهیان ئەو یەک ژی دیار کر، ئەمریکا و ئسرائیل ناخوازن رەوشا رۆژهەلاتا ناڤین یا ئارام بیت، ب سالانە ئەمریکا رەوشا دەڤەرێ ئالۆز دکەت و هێزێن ئەمریکا ژی نها ل گەلەک دەڤەرێن رۆژهەلاتا ناڤین هەنە و ئەمریکا رێزێ ل سەروەریا چو وەلاتەکێ ناگریت، هەکە ئەمریکا دڤێت رەوشا دەڤەرێ یا ئارام بیت دڤێت بەری هەر تشتەکێ هەموو هێزێن خوە ل رۆژهەلاتا ناڤین ڤەکێشیت و رێزێ ل سەرورەیا هەموو وەلاتێن رۆژهەلاتا ناڤین بگریت.
