ئیران: بۆ راگرتنا شەڕی دڤێت وەلاتێن دەڤەرێ هاریکاریا مە بکەن
وەزارەتا دەرڤە یا ئیرانێ دوهی راگەهاند عەباس عێراقچی وەزیرێ دەرڤە یێ ئیرانێ دێ سەرەدانا چەندین وەلاتێن رۆژهەلاتا ناڤین کەت و بریارە سەرەدانا هەر یەک ژ وەلاتێن مسر، تورکیا، ئوردن و چەند وەلاتێن دی بکەت، ئیرانێ دڤێت ل گەل وەلاتێن رۆژهەلاتا ناڤین بەحسێ راگرتنا شەڕی بکەت، چونکی شەڕێ نها د ناڤبەرا ئسرائیلێ ل گەل حزبوللا یا لوبنانێ دێ کاریگەری ل سەر هەموو وەلاتێن رۆژهەلاتا ناڤین هەبیت و دڤێت هەموو ئالی پێکڤە کار بکەن دا شەڕێ نها بهێتە راگرتن.
وەزارەتا دەرڤە یا ئیرانێ ئەو یەک ژی دیار کریە، تورکیا و مسر وەلاتێن بهێزن و دشێن رێگریێ ل پیلانێن خراب یێن ئسرائیلێ بکەن، چونکی ئسرائیلێ دڤێت دەڤەرا رۆژهەلاتا ناڤین تووشێ کارەساتەکا مەزن بکەت و دڤێت ئەم نەهێلین رەوشا هەی خرابتر لێ بهێت.
ل ئالیێ دی چاڤدێرێن سیاسی ژی وەسا دبینن پشتی ئێرشا ئیرانێ یا ل سەر ئسرائیلێ نها ئسرائیل بەرهەڤیان دکەت دا ئێرشی ئیرانێ بکەت و بەری چەند رۆژان سەرۆک وەزیرێن ئسرائیلێ ژی راگەهاند دێ ئێرشا ئسرائیلێ یا ل سەر ئیرانێ گەلەک دژوار بیت و دێ زیانەکا مەزن گەهینە بنگەهێن سەربازی و ئابووری یێن ئیرانێ.
ل گۆر باوەریا چاڤدێرێن سیاسی بزاڤێن نها یێن ئیرانێ بۆ ڤێ یەکێ نە دا پشتەڤانیا وەلاتێن رۆژهەلاتا ناڤین ل دژی ئسرائیلێ بدەستڤە بینیت، لێ ژ بەر کو پڕانیا وەلاتێن رۆژهەلاتا ناڤین ژ رۆلێ ئیرانێ یێ ل دەڤەرێ رازی نینن گەلەک یا ب زەحمەتە ئەو پشتەڤانیێ ل بزاڤێن ئیرانێ بکەن، لێ د هەمان دەمی دا بۆ بەرژەوەندیێن خوە دێ بزاڤا ڤێ یەکێ کەن دا شەڕێ نها بهێتە راگرتن.
