ئیران ب توندی بەرسڤا ترامپی ددەت
بەری دو رۆژان سەرۆکێ ئەمریکا د داخۆیانیەکێ دا دیار کر تنێ دو رێ ل پێشبەری ئیرانێ ماینە، یان دڤێت ئیران داخوازیێن ئەمریکا قەبوول بکەت و ل گەل ئەمریکا رێککەفتنەکێ ئیمزا بکەت یان ژی دێ ئیرانێ بۆمبەباران کەین، لێ وەکو ئەمریکا وان نەڤێت ئێرشی ئیرانێ بکەن.
ترامپی ئەو یەک ژ دیار کربوو هەکە ئیران دەست ژ بەرنامێ خوە یێ ئەتۆمی بەرنەدەت ئەو دێ ل گەل ئسرائیلێ ئێرشی ئیرانێ کەن و دێ ئیرانێ ژناڤ بەن.
ل هەمبەر گەفێن ترامپی دوهی مەسعود پزیشکیان سەرۆک کۆمارێ ئیرانێ راگەهاند کو ئەو ژ گەفێن ئەمریکا و ئسرائیلێ ناترسن و دێ بەرگریێ کەن و ئیران پتر ژ هەر دەمەکێ د ئامادەباشیێ دایە و دێ بەرسڤا هەر ئێرشەکێ دەت، لێ زمانێ ترامپی یێ ئاشتیێ و چارەسەریێ نینە، بەلکو ئەمریکا دڤێت ل ژێر ناڤێ رێککەفتنەکا نوو داخوازیێن خوە ل سەر ئیرانێ فەرز بکەت، لێ ئەو یەک ب چو رەنگەکێ ناهێتە قەبوول کرن.
