ئیران خوە بۆ هەر ئەگەرەکێ بەرهەڤ دکەت
بەرپرسەکێ وەزارەتا دەرڤە یا ئیرانێ دیار دکەت، دانوستاندنێن وان ل گەل ئەمریکا بەردەوامن، ئەگەرێ رێککەفتنێ هەیە و ئەگەرێ شکەستنا دانوستاندنان ژی هەیە، چونکی ئیران ب چو رەنگەکێ رازی نابیت پیتاندنا ئۆرانیۆمێ بهێتە راگرتن و ژ بەر ڤێ یەکێ ژی بەری نها ئیرانێ داخوازیا ئەمریکا ل دۆر راگرتنا پیتاندنا ئۆرانیۆمێ رەت کریە.
هەمان بەرپرسی کو ناڤێ وی نەهاتیە ئاشكرا کرن بۆ ئاژانسا مێهر یا ئیرانێ دیار کریە، وەکو ئیران ئەو خوە بۆ هەر ئەگەرەکێ بەرهەڤ دکەن، ب تایبەتی ژی نها مەترسیا ئێرشا ئسرائیلێ ل سەر بەرنامێ ئەتۆمی یێ ئیرانێ هەیە و ئیرانێ ژی بەرهەڤیان تەمام کرینە و هەکە ئسرائیل شاشیەک وەسا بکەت ئیران دێ ب هەموو شیانێن خوە بەرسڤا ئسرائیلێ دەت.
بەری نها بەرپرسەکێ ئەمریکا ژی دیار کربوو ئسرائیلێ دڤێت بێی پشتەڤانیا ئەمریکا ئێرشی بەرنامێ ئەتۆمی یێ ئیرانێ بکەت و ئسرائیل چاڤەرێی ئەنجامێ دانوستاندنێن ئەمریکا و ئیرانێ ژی نابیت و دێ ئێرشی بەرنامێ ئەتۆمی یێ ئیرانێ کەت.
