ئیران داخوازا هاریکاریێ ژ فرەنسا دکەت
ل گۆر راپۆرتەکا ئاژانسا دویچە ئەلمانی سەرۆک کۆمارێ ئیرانێ مەسعود پزیشکیان ب رێیا تەلەفۆنێ ل گەل ئیمانوێل ماکرۆن سەرۆکێ فرەنسا ئاخڤیە و داخواز ژێ کریە فشارێن خوە ل سەر ئسرائیلێ زێدەتر لێ بکەت دا ئیسرائیل یا نەچار بیت ئێرشێن خوە یێن ل سەر غەزە و لوبنانێ بدەتە راگرتن، چونکی بەردەوامیا شەڕێ نها دێ کاریگەریەکا خوە یا گەلەک خراب بۆ هەموو رۆژهەلاتا ناڤین هەبیت و ژ بەر هندێ ژی گرنگە فرەنسا ب رۆلێ خوە رابیت دا دووماهی ب شەرێ نها بهێت.
هەمان ئاژانسێ ئەو یەک ژی دیار کریە، سەرۆک کۆمارێ ئیرانێ دیار کریە وەکو ئیران وان نەڤێت شەڕێ چو ئالیەکێ بکەن، لێ هەکە ئسرائیلێ بڤێت ئێرشی ئیرانێ بکەت ئەو بۆ شەڕی ژی بەرهەڤن و دێ بەرەڤانیێ کەن.
هەروەسا هاتیە راگەهاندن کو سەرۆکێ فرەنسا ژی د پەیوەندیا تەلەفۆنی دا دیار کریە کو دڤێت حەماس هەموو گرتیێن د دەستێ خوە دا بێی مەرج ئازاد بکەت و هەروەسا حزبوللا ژی ئێرشێن خوە بدەتە راگرتن دا ئەو بشێن ل گەل ئسرائیلێ دەست ب دانوستاندنان بۆ راگرتنا شەڕێ نها بکەن، چونکی هەتا ئەو یەک نەهێتە کرن ئسرائیل ژی ئێرشێن خوە نادەتە راگرتن.
