ئیران: مە خوە بۆ هەر پێشهاتەکێ بەرهەڤ کریە
موحسن رزایی فەرماندارێ بەرێ یێ پاسدارێن ئیرانێ و شیرەتکارێ رێبەرێ ئیرانێ دیار کر، زانیاریێن تەمام ل بەر دەستێ وان هەنە کو ئسرائیل بەرهەڤیان بۆ ئێرشەکا نوو ل سەر ئیرانێ دکەت، ل هەمبەر ڤێ یەکێ ژی نها هێزێن سەربازی یێن ئیرانێ بەرهەڤیێن خوە کرینە، هەکە ڤێجارێ ئسرائیل ئێرشی ئیرانێ بکەت وەکو جارا بۆری نابیت، ئیران دێ ب موشەکێن گەلەک پێشکەفتی ل ئسرائیلێ دەت و بێگومان شەڕێ ڤێجارێ دێ گەلەک بەرفرەهتر بیت.
ناڤهاتی ئەو یەک ژی دیار کر، ئیرانێ بەری نها گەلەک بزاڤ کرن پرسا بەرنامەیێ ئەتۆمی ب رێیا دانوستاندنان ل گەل ئەمریکا و وەلاتێن رۆژئاڤایی چارەسەر بکەت، لێ ئەمریکا و وەلاتێن رۆژئاڤایی گرێدای سۆزێن خوە نەبوون، ئەمریکا هاریکاریا ئسرائیلێ کر دا ئێرشی ئیرانێ بکەت و سێ وەلاتێن ئۆرۆپی ژی سزایێن گران ل سەر ئیرانێ سەپاندن و ژ بەر ڤێ یەکێ ژی باوەریا ئیرانێ ب دانوستاندنێن ل گەل ئەمریکا ناهێت.
