ئیران: مە دڤێت رێککەفتنا بەری نها وەکو خوە بهێتە بجهئینان
پەیڤدارێ وەزارەتا دەرڤە یا ئیرانێ راگەهاند، ئەو ب رێیا وەلاتێ عومانێ ل گەل ئەمریکا دانوستاندنان دکەن، هەکە ئەمریکا هندەک ژ داخوازیێن ئیرانێ قەبوول بکەت ئەو د بەرهەڤن وان وەلاتیێن ئەمریکا یێن کو نها د زیندانێن ئیرانێ دانە ئازاد بکەن.
سەبارەت ب داخوازیێن ئیرانێ ژی ناسر کەنعانی دیار کر، بەری نها رێککەفتنا ئەتۆمی د ناڤبەرا ئیرانێ و ئەمریکا دا هاتبوو ئیمزا کرن، لێ دەمێ ترامپ هاتیە سەر دەستهەلاتێ ئەو رێککەفتن هاتە هلوەشاندن، وەکو ئیران مە دڤێت رێککەفتنا ئەتۆمی یا بەری نها وەکو خوە بهێتە بجهئینان و هەکە ئەو یەک ژ ئالیێ ئەمریکا ڤە بهێتە قەبوولکرن ئەو بەرهەڤن ل گەل ئەمریکا دانوستاندنان بکەن، لێ هەتا نها چو رێککەفتنەک نەهاتیە کرن و دانوستاندن ژی ب رێیا وەلاتێ عومانێ بەردەوامن.
ل ئالیێ دی هەتا نها بەرپرسێن ئەمریکا ب رەنگەکێ فەرمی سەبارەت ب دانوستاندنێن وان ل گەل ئیرانێ چو داخۆیانیەک بەلاڤ نەکرینە و ئسرائیل ژی هۆشداریێ ددەت هەکە رێگری ل ئیرانێ نەهێتە کرن و ئیران کار بۆ دروستکرنا چەکێ ئەتۆمی بکەت ئەو دێ ئێرشی بنگەهێن ئەتۆمی یێن ئیرانێ کەن.
