ئیران: مە چو پەیوەندی ب ئێرشا ل سەر هێزێن ئەمریکا ڤە نینە
ناسر کەنعانی پەیڤدارێ وەزارەتا دەرڤە یا ئیرانێ راگەهاند کو ئیرانێ چو پەیوەندی ب ئێرشا ڤێ دووماهیێ ل ئوردنێ نینە کو ل سەر هێزێن ئەمریکا هاتیە کرن، ئیران پشتەڤانیێ ل ئارامیا دەڤەرێ دکەت و نەڤێت رەوشا هەی ئالۆزتر لێ بهێت، ژ بەر ڤێ یەکێ ژی ئیرانێ چو پەیوەندی ب وێ ئێرشا ڤێ دووماهیێ نینە کو د ئەنجام دا هندەک سەربازێن ئەمریکا ل وەلاتێ ئوردنێ هاتینە کوشتن.
ئەو یەک د دەمەکێ دایە کو هژمارەک بەرچاڤ ژ سیناتۆرێن کۆماری ل ئەمریکا داخواز ژ جۆ بایدن سەرۆکێ ئەمریکا کرینە کو ئێرشی ئیرانێ بکەت و ب توندی وی وەلاتی سزا بدەت و سەرۆکێ ئەمریکا ژی دوهی راگەهاند ئەو دێ وان هێزان سزا دەن یێن ئێرشی هێزێن ئەمریکا ل ئوردنێ کری، ئەمریکا دێ ب توندی بەرسڤا وان دەت و رێ نادەین جارەکا دی ئێرشی هێزێن ئەمریکا بهێتە کرن.
