ئیران نەشێت پەترۆلا خوە بفرۆشیت
بەرپرسەکێ وەزارەتا دەرڤە یا ئیرانێ کو نەخواستیە ناڤێ وی بهێتە ئاشکرا کرن بۆ ئاژنسا مێهر یا وی وەلاتی دیار کریە، پشتی گەفێن ئەمریکا نها گەلەک وەلات و کۆمپانی پەترۆلا ئیرانێ ناکڕن و نها چەند ملیۆن بەرمیل پەترۆلا ئیرانێ ل چینێ یە و کەس ناکڕیت و ئەو یەک ژی دێ کاریگەریا خوە یا گەلەک خراب ل سەر بارێ ئابووری یێ ئیرانێ هەبیت.
هەمان بەرپرسی ئەو یەک ژی دیار کریە ب هاتنا ترامپی دێ سزایێن گەلەک مەزنتر ژ جاران ل سەر ئیرانێ هێنە سەپاندن و گرنگە ئیران رێیەکێ بۆ فرۆشتنا پەترۆلا خوە پەیدا بکەت.
چاڤدێرێن سیاسی ژی دیار دکەن ئیرانێ دڤێت پارێ پەترۆلا خوە بدەتە هێزێن چەکدار دا ئەو بشێن ل دژی ئسرائیلێ شەڕی بکەن ب تایبەتی ژی حزبوللاهێ و ژ بەر ڤێ یەکێ ژی ئەمریکا هۆشداری دایە گەلەک وەلاتێن جیهانێ کو نابیت پەترۆلا ئیرانێ بکڕن و یێ پێگیر نەبیت دێ ژ ئالیێ ئەمریکا ڤە هێتە سزادان.
