ئیران: هاریكاریێن چو لیژنێن بیانی ناكه‌ین
ئه‌ڤرۆ:
ناسر كه‌نعانی په‌یڤدارێ وه‌زاره‌تا ده‌رڤه یا ئیرانێ سه‌باره‌ت ب پێكئیانانا لیژنه‌كێ ژ ئالیێ نه‌ته‌وه‌یێن ئێكگرتی ڤه سه‌باره‌ت ب ڤه‌كۆلینان ل دۆر كوشتیێن ڤێ دووماهیێ ل ئیرانێ راگه‌هاند كو ئیران وه‌لاته‌ك سه‌ربخوه‌یه و ئه‌و رێ ناده‌ن چو لیژنێن بیانی سه‌ره‌دانا وه‌لاتێ وان بكه‌ن، هه‌روه‌سا ئه‌و هاریكاریا چو لیژنێن وه‌سا ژی ناكه‌ن و زانیاریان ژی ناده‌نه وان.
ناڤهاتی ئه‌و یه‌ك ژی دیار كر كو ئالیێن په‌یوه‌ندیدار ل ئیرانێ دێ ڤه‌كۆلینێن پێدڤی كه‌ن و دێ راستی بۆ رایا گشتی هێنه ئاشكرا كرن، چونكی ئه‌مریكا و گه‌له‌ك وه‌لاتێن دی بابه‌تێ خوه‌نیشادانێن ڤێ دووماهیێ ل ئیرانێ مه‌زن كرینه و دخوازن وه‌كو كارته‌كێ ل دژی ئیرانی بكار بینن و گۆت: (ئه‌م رێ ناده‌ین چو لیژنێن وه‌سا سه‌ره‌دانا ئیرانێ بكه‌ن، چونكی سازیێن په‌یوه‌ندیدار دێ ده‌ست ب كارێ خوه كه‌ن و د ده‌مه‌كێ وه‌سا دا پێدڤی ناكه‌ت چو لیژنه ل ده‌رڤه بهێن و ده‌ستێوه‌ردانێ د كاروبارێن ناڤخوه‌یی یێن ئیرانێ دا بكه‌ن).
